昨日有消息指跟隨成龍二十多年的盧惠光，因被「炒」時僅獲十萬元補償，有意向勞工處求助。不過光仔昨日否認：「我從來冇話主動搵勞工處。另外話洪金寶幫我，雖然佢有搵過我拍廣告，但都要我適合至得，我有付出o架！（話成龍欠人情味喎？）唔想評論，個天睇到晒一切。」至於同樣被指遭炒魷後大感不忿的成龍前近身助手段偉倫則說：「我離開咗七年，好在自己識得謀生；我喺沙士時畀人炒好悽慘。（話成龍冇人情味？）大家好明白。」
傳聞亦暗指成龍前經理人陳自強對離職一事感到不快，陳自強則表示與成龍仍有聯絡：「我哋過時過節有互Send短訊，我跟咗佢三十幾年，大半世人都畀咗佢。祖名同嬌姐（林鳳嬌）都對我好好，當年我睇住阿仔（祖名）出世，同成龍喺醫院一齊喊，人哋都好奇怪邊個係老竇。」對於好友光仔及段偉倫被指轟成龍，他說：「可能佢哋屈咗咁耐，吐番出嚟都係好嘅。其實依家搵番啲舊嘢嚟講好無謂，開心嘢記住咪得囉，唔開心唔好記喇！」
對於種種負面傳聞，祖名昨日挺身力撐父親：「我眼中所見，爸爸對員工好好，係講義氣。其實屋企（事業）一直以嚟咁成功，係因為朋友同義氣。」祖名又強調所有員工都在和平氣氛下離職，有些到現在仍與父親維持合作關係。