13/05/2010

播放本新聞相關短片

張栢芝誕7磅7B仔

恭喜!恭喜!謝霆鋒和張栢芝第二個愛情結晶品,昨晚「千呼萬喚始出來」!栢芝於養和醫院剖腹分娩,誕下7磅7安士男嬰,母子平安。謝家上下俱以雀躍心情迎接新生命來臨。

據消息透露,栢芝昨晚9時30分才入產房準備剖腹生BB,但拉姑表示六時許已準備,四哥則指八時四十五分入產房。而霆鋒全晚伴隨栢芝身旁,十分體貼。再度榮升爺爺嫲嫲的謝賢(四哥)及狄波拉難掩靚爆心情,昨晚10時30分代表霆鋒和栢芝宣布喜訊,四哥說:「多謝大家關心,小朋友已經出咗世,辛苦晒大家。(BB幾重?)重7磅半。」拉姑在旁即更正說:「係7磅7安士。」問到BB是順產還是剖腹?拉姑說:「開刀。(霆鋒剪臍帶?)應該有。(邊個揀時辰?)佢揀嘅。(霆鋒定栢芝?)係BB揀。(似邊個?)似霆鋒同栢芝。(霆鋒今晚陪栢芝?)應該會。(改名未?)霆鋒未有感覺,睇吓個樣似邊個先,英文名有幾個心水,依家幫BB沖緊涼。」

堵塞停車場惹鼓譟

四哥表示Lucas已見到細佬,感到很開心及鍾意,他又表示曾以英文問Lucas:「Do you like your brother?」Lucas精靈地說:「Yes!」再問四哥栢芝是否已甦醒?四哥說:「好快醒番,好精神,冇乜嘢。」問到會否發放BB相片?拉姑即說:「咁開心嘅事,梗係會!」公布喜訊後不久,栢芝姐姐戴碧芝先行帶Lucas離開,但拍卡離開停車場出閘時有阻滯,塞住約十分鐘,令隨後的座駕司機一度鼓譟。

由於昨日是栢芝生BB好日子,吸引半百記者採訪,現場亦有數名保安維持秩序。再做老竇的霆鋒,昨午三時半架上墨鏡及一身Casual打扮離開赤柱舂坎角豪宅,先到銅鑼灣接Lucas。至四時許,兩父子偕工人乘坐七人車到養和,半百傳媒蜂擁而上,場面混亂,「升呢」做哥哥的Lucas,原本笑晒口四圍望,相當精靈,但因現場太混亂,兩父子花了數分鐘才行到入醫院成功入電梯,Lucas此際不禁扁嘴,霆鋒亦笑容欠奉。據悉,霆鋒將陪栢芝度過本月24日的生日後,本月25日才正式復工,返內地逗留個多月拍電影,積極搵奶粉錢,認真勤力!

否認改英文名Focus

而「鋒芝」兩家人及霆鋒經理人霍汶希(Mani)等,陸續到醫院探望,每當有相關人士現身醫院,均惹來傳媒追訪。而郭偉亮只是「兩梳蕉」探望,他笑說:「係呀!(點解?)因為唔使囉!」婷婷則帶着鮮花,與男友安志杰到醫院。

另外,霆鋒前晚到訪好友郭偉亮寓所,逗留至昨日凌晨十二時半折返醫院。問他是否通宵陪栢芝,他帶笑點頭,但不到五分鐘又離開,並說:「我上到去全部人瞓晒覺,都係走喇!(囝囝改名叫Focus?)唔係。」而戴碧芝昨午到醫院探望妹妹,當時問她栢芝身體狀況如何?她說:「OK啦!」

第一手消息請瀏覽on.cc《即時新聞》

專案組