祥仔怪自己先天不足，孖膶腸脹卜卜，腰纏重磅脂肪，身形肥過部電單車，所以不能像祖藍駕馭嬌小玲瓏的女性媚態，若然要扮得成功，事前就要做更多工夫：「我每次扮嘢，事前真係要做好多功課做Research，睇晒所扮對象嘅戲同唱歌技巧，然後抽絲剝繭取其重點，呢啲係要經驗去累積嘅！」

專揀肥仔扮

祥仔自知肥底，扮某類人總是如履薄冰，他一言道出問題癥結所在：「我一世都冇可能扮到掃街茂，佢咁瘦，點扮都唔會似啦！但我覺得就係唔似，扮佢先有反差，觀眾先會睇得開心。」他續說：「不過我通常都會揀番同我體形接近嘅對象，因為我唔敢去冒險，我想有信心先去扮，好似扮陳振聰、洪金寶同Tiger Woods，我覺得真係扮得好似，以Tiger Woods為例，只要搽黑塊面，再整厚啲雙唇，黐少少化妝棉就搞掂！」

相對昔日《歡樂今宵》年代，香港的扮嘢能手買少見少，盧海鵬、羅浩楷、鄭少秋等亦年華老去，梅小惠及苑瓊丹似在休養生息，扮嘢能手出現青黃不接的現象，「福祿壽」肩負的責任不只是娛樂大家，更需要保存這種表演藝術，祥仔說：「我覺得香港唔可以冇諧星，冇人扮嘢搞笑個壓力煲會爆o架！我覺得我哋三個係臭皮匠，三個都有唔同嘅搞笑天分，我哋有唔同嘅長處，集合埋就係最強組合。」

表演咩都殺

談到各人的長處，祥仔自鳴得意說：「我哋三個都好唔同，思捷扮嘢好細緻，一顰一笑都拿捏得好好；祖藍唔只扮人叻，填詞都好有天分，好多隻歌都由佢嚟填詞，好犀利；我就比較識控制現場氣氛同Timing，令現場觀眾睇得更加過癮，再加上阿姐，我哋可以完全互補不足。」

大家有否記得祥仔是歌手出身，N年前以氣吞天下之勢，奪得《第二屆全港十八區業餘歌唱比賽》季軍，但昨非而今是，做歌手滑鐵盧，現在換上另一種形式在舞台發光發熱，祥仔從沒有氣餒：「我喜歡表演，無論扮嘢、拍劇、唱歌我都鍾意！我太享受舞台表演，自己亦都好知足，做人唔可以太過貪心。」