現年28歲、港姐冠軍曹敏莉（Mandy）自08年底與港男黃長興分手後，曾與于文鳳兄長于樹基發展，可惜無疾而終。她於二月受訪時仍表示，希望覓得真命天子，杜絕爛桃花，最終得償所願！據知，Mandy於今年初翻撻從事金融業、坐擁逾半億身家的張家傑（Jacky），昨日更突然宣布與他年底結婚！

據知，Jacky在財金界甚有名氣，投資眼光獨到，有傳他名下豪宅包括君臨天下及凱旋門等，總值逾6,000萬元；反觀長興參選港男後，苦撈無綫多年依然徘徊二、三線位置。Jacky在紐約以三卡鑽戒誠意打動伊人芳心，抱得美人歸。兩人計劃年底在港設宴，但儀式一切從簡。

阿媽暗讚最好

記者昨日致電Mandy求證，她坦言家人也替她覓得好歸宿而開心：「其實屋企人幾年前已識得佢，媽咪好錫佢，又讚佢穩重！」Mandy笑言曹媽媽沒有拿Jacky與其舊男友比較，似乎暗示這位東床快婿是最好！問到為何早年分手？她表示兩人聚少離多才情變，指愛郎雖不時在外地工作，但已承諾婚後會多留港。問到年底設宴會否邀請圈中好友？她說：「請啲Close啲嘅朋友，唔想搞到太複雜！」當問到會否通知長興？她顯然不願多提舊愛：「TVB嘅同事只係通知咗樂小姐（樂易玲）同經理人。」Mandy還透露與無綫已約滿，但會斟洽其他合作方式，安心過少奶奶生活。問到何時生小朋友？她說：「都會生！我哋好鍾意小朋友。」

「舊愛」齊送祝福

現身在外地的黃長興昨日以短訊回覆記者：「如果佢真係結婚，我都戥佢高興嘅！既然搵到適合嘅人點解唔結婚？恭喜同祝福佢！」而曾與Mandy傳緋聞的謝天華聽到對方的婚訊即興奮地說：「係咪真嘅先，係就恭喜佢！之前拍劇都知佢有拍拖。（帶過出嚟見人？）咁又冇！（佢話計劃生仔！）都應該呀！（幾時到你？）等佢先啦！我依家未得閒呀！」

曹敏莉妹妹曹蕙蘭（前名曹敏寶）透過電話訪問，激讚未來姐夫愛屋及烏，問到家姐是否有喜？曹蕙蘭說：「一定唔係，反而大家姐七月就生！」對於有指Jacky十分「有米」？她說：「總之我兩個姐夫喺呢方面都幾有實力！」她又坦言沒有特別通知長興：「如果大家係朋友，又知道家姐結婚，應該打嚟恭喜囉！」