男子Rap組合農夫昨日為下月16日舉行的《農夫Down To Earth演唱會》舉行記者會，並以海報中的野人及太空人造型現身，C君搞笑地自稱「十月黎明」，而穿上密封式太空衣的陸永則全程「無話可說」，只能靠手勢表達感受。

腳軟軟要人扶

當大會安排二人到戶外拍照時，由於天氣酷熱，陸永一度焗到頭暈，工作人員急忙為他除下頭罩，怎料鎖匙失靈，以致脫不下！眼見陸永一臉痛苦，幾乎窒息，C君與工作人員非常緊張，立刻帶他返休息室，期間陸永更「發軟蹄」，要C君扶實，幸好最終在助手協助下成功「脫險」！

陸永險焗暈，無奈頭罩因壞鎖而未能脫下，令工作人員非常緊張！

死過翻生的陸永（左）驚魂未定，C君在旁慰問。

「死過翻生」的陸永受訪時說：「呢套衫之前着過好多次，都冇發生呢個問題，不過頭先真係好焗，內置嘅風扇又壞咗，搞到我依家都有少少恐懼感！（演唱會再着？）唔會啦！有另一套冇頭罩嘅，安全好多！」至於C君則表示，屆時有一Part長達45分鐘的「雙篤笑」，內容恐怕會得罪不少天王巨星，至於嘉賓方面，他說：「係巨星，對我哋嚟講好有意義，係樂壇嘅組合班霸！」