據美國網站Radar Online報道，荷爾與Gabriel已分手數個月，並已找律師商討有關二人育有兩歲大的女兒Nahla的撫養權及財政和解問題。有知情人士爆料：「Gabriel覺得感情冇得救，初時佢覺得年紀相差9年唔係問題，荷爾又係佢拍拖以嚟最靚嘅女友，好愛佢（荷爾）。但慢慢佢感到姊弟戀嘅阻礙，同埋開始留意其他女人，我懷疑佢睇上咗某個人，想喺有進一步發展前同荷爾提出分手。」而Gabriel前日亦發聲明證實「分」訊，他表示仍會尊重及愛護荷爾，亦讚她是認識過最美麗及特別的女人。

愛巢歸男方

曾經歷兩次婚姻失敗的荷爾，雖然曾表示對婚姻已冇憧憬，但她認定Gabriel是真命天子，並與他育有女兒Nahla，故今次被飛應該令她非常傷心。不過，荷爾上周四在紐約出席公開活動時，面對公眾依然笑容滿面，更與一名神秘黑人男子拖手睇舞台劇，心情輕鬆。

有指荷爾曾擔心男友只為了她的錢，但Gabriel表明不想得到荷爾一分錢，只想共同撫養女兒。而二人位於加拿大的愛巢，由於荷爾曾付首期，但Gabriel則負責供樓，故他提出希望得到該寓所，荷爾亦爽快答應。另外，有報道指荷爾在分手期間，曾秘密將位於比華利山的寓所以約3,900萬港元放盤，但近日該住宅已停止出售。