超儀自言與父親關係十分好，近年更學懂報喜不報憂，以免家人擔心：「講得多，佢（指父親）只會擔心我，或者會做啲好爆嘅嘢。好多年前，我爹哋想幫我同電視台老闆打好關係，叫對方關照吓，特登送咗一箱唔知橙定桃過去，諗住電視台老闆會打番畀佢，點知人哋就送番一箱桃畀佢做回禮，真係好周星馳電影！呢件事令我覺得好窩心又好好笑，爹吔真係好錫我！」
既然父親如此疼錫，問到曾奪金像獎最佳女配角的超儀，會否立下目標攞影后報答父親？她笑說：「呢個係佢嘅目標，日日返去食飯都問我攞咗獎未？呢樣嘢我都想，但我亦了解到拍戲時唔好諗呢樣嘢，虛榮心會好影響自己，我最大嘅目標係成為好傑出同好偉大嘅表演者，做呢行我冇嘢望，只望人哋第日想當年會記得我拍過嘅某一場戲。」
俗語有云「三年一個代溝」，超儀與父親年齡的差距不知有多少個代溝，她的世界、所做的事，父親未必全都能明白。問到有否給父親看自己的作品？她說：「佢睇過少少《豪情》，問我係咪想做肉彈，我知佢因為擔心，佢會覺得點見人呢？惟有成家人解釋畀佢聽唔係做肉彈。（佢只係睇咗一段？）唔係！佢係聽傳媒講，當時發相都係Sell嗰段，佢會諗『你會唔會成套戲都係咁？』好彩之後攞咗獎。（新戲殺人又血腥，驚唔驚？）我報咗案，或者製作一啲一級嘅特輯畀佢睇，哈哈！我都有同佢講喺烏甸尼斯有人睇我套戲睇到嘔，佢話：『咁大單！』」