收OT錢被寸

除了被暗箭所傷，超儀亦曾兜口兜面聽過難聽說話，又是被標籤了「有錢女」這三個字所累！她 說：「我曾經有啲幼稚咁問人哋，我有冇OT費，當時嗰個人嘅反應係：『嘩！你同我講OT，我畀你嘅OT費都只係兩萬零三萬蚊，你買件衫都冇咗啦！』我唔係失望佢唔畀OT錢我，而係佢咁講！」其實超儀大可以疊埋心水打理家族生意，就不用攞苦嚟辛，不過她說：「我都試過坐Office，有年放暑假落去家姐間公關公司幫手，唔知自己做乜，試過要設計遊戲畀明星玩，打電話畀藝人度期，我當時讀緊中學，識咩度期，係咁畀人寸，之後仲要畀家姐鬧，連普通影印，我都影印得唔好，真係好廢！我鍾意發夢，會喺屋企發神經練舞，要我好哋哋坐喺度，會發癲，做唔到！都係做番自己喜歡嘅工作。」

個個當佢玩

既然注定要吃演藝這口飯，超儀與Juno都要接受被標籤為「有錢人」所帶來的阻礙，超儀說：「名人後代一定要接受呢個事實，由出道到依家，呢樣嘢的確係對演藝事業發展造成阻力，大家都掛住同你開玩笑，我話想出嚟搵嘢做，有啲人會講『唔好玩啦！你請我咋啩！』我哋真係要用雙倍時間去行呢條路，就算不停講我唔係嚟玩，我係嚟做嘢O架！但始終都改變唔到人哋嘅睇法，惟有Keep住做嘢畀人睇，啲人先會感受到你係認真！（背住有錢女之名，係咪好多唔好處？）如果咁講，我覺得好折墮，人生方面好幸福，但背住呢樣嘢喺娛圈發展確實係阻礙。其實基本上呢個家族出身，投身邊個行業，都係會遇到呢啲待遇，除非你冇乜理想只為打份工咁就冇問題，冇認真做，就唔會介意人哋點睇，但我唔可以。」

爭角色驚到震

為了「洗底」，超儀只好加倍努力，如今與Juno總算捱出「名」來，出名拚搏又捱得，超儀更開設電影公司「852」，拍了創業作《維多利亞壹號》，當中還有一段古！該劇本是由彭浩翔創作，Juno因十分喜歡便一起搞，並當殺手一角，其後超儀亦因很喜歡劇本而投資，飾演另一殺手，最後因彭浩翔寫完劇本，發覺殺手只可有一人，所以叫二人「拆掂佢」。超儀坦言對「講數」的情景記憶猶新：「一張枱我同陳子聰、Juno同佢助手，對住坐。我知Juno好鍾意個古仔，彭浩翔亦寫咗個角色畀佢，但到最後套戲唔可以有兩個殺手，叫我同Juno拆掂佢，睇吓邊個做。講嗰陣驚到對腳喺枱底係咁震，始終唔係熟得咁緊要，就已經要同人哋講，我搶咗你最鍾意嗰樣嘢，但佢又好平靜，唔係諗咗太耐，就話冇問題你攞去啦！」正因為這個前因，超儀更感激Juno為《維》片客串：「佢嘅出現係一個祝福，一種精神支柱，好多謝佢。」不過，能夠有錢拍得成《維》片，則要感激拿出一億元給她開設電影公司的父親何鴻燊。問到誰做主動啟動這個大計？超儀說：「我問嘅，寫晒計劃書。（爹哋有冇刁難你、試驗你？）冇！明嘞！佢唔刁難你，壓力咪仲大，我畀咁多空間你，你唔係做唔到呀？嗰下仲恐怖、壓力好大，套戲就快上，我已經失眠，同埋要飲咖啡、酒嚟減壓。」