除了彭浩翔和超儀外，Juno在圈中的人緣不錯，他與何韻詩、軟硬天師及倫永亮等，都能在音樂理念上擦出意想不到的火花。Juno剛出道的經典慢歌如《耿耿於懷》和《有人》等，現時仍是唱K熱播之選，不過近年他作出突破，比人行前一步，炮製被指為偏鋒的《雌雄同體》及《弱水三千》，成績不俗，事實證明外界對他的轉變非常受落，他說：「我係Pop Singer，唔係玩Heavy Metal或者係Hip Hop Singer，但我有自己風格，會喺主流同偏鋒攞個平衡，我唔鍾意重複成功模式，唔可以照Dup同一樣嘢，應該係繼續發掘多啲新題材，要畀樂迷新鮮感。啲人覺得Juno應該係唱男仔歌，無端端用陰陽怪氣聲線去唱歌，但事實證明呢個付出係有回報。」能夠做到自己喜歡的事情，如拍戲、做音樂及擁有自家潮牌，那份滿足感確實非筆墨能形容。問到此刻是否快樂？他說：「我好珍惜我依家所擁有嘅嘢，係我努力得番嚟嘅成果！」
Juno在新戲《剖術者》與AV女優蒼井空結片緣，而蒼井空曾表示與Juno有發展可能，Juno聞言亦大讚對方：「佢係好好女仔、好豪爽、有義氣、性格男仔頭而且隨和，聽到呢個報道，都有少少驚訝！（同佢發展？）暫時冇諗過，要相處了解咗先。」他相信一見鍾情，會主動出擊追女仔，問到會否擔心「食檸檬」？他笑說：「呢啲互相感應到，大家會Feel到有冇好感，我係專一嘅人，第時拍拖，我仍然會有女性朋友，但真係純粹朋友，呢點要分得好開。」問到將來拍拖會否公開？他說：「若然雙方都有共識，我係唔介意公開，不過要教佢點樣面對傳媒。（結婚？）都會公開，又唔係秘密，而且結婚牽涉到好多人，包括家人同身邊朋友。」他不諱言將來也不介意做未婚爸爸：「當然亦要睇雙方配合啦！」