很多新進歌手或藝人都是由一張白紙、由零開始踏入娛樂圈，偏偏麥浚龍（Juno）初入樂壇時，與「負」字不可分割，他要由負分開始闖樂壇，然後應付無日無之的負面新聞，被四圍的負能量包圍，所走的演藝路相比其他同期新人來說，確實有點難走。由於Juno家庭背景比較特別，父親是中建電訊集團主席麥紹棠，外界難免將他界定為含着「金鎖匙」出世，而且是「唔憂做」的有錢仔。

雖然出道時是非不絕，又要背負着無形包袱，但Juno仍咬緊牙關一一捱過，今天回首過去，入行第八個年頭，他心平氣和地說：「我屋企背景係比較特別，好多人以為我行呢條路會易，呢啲係好多人嘅睇法，其實我條路相對地嚟講比較難行，我入行時同其他新人唔同，佢哋係由零開始，而我就係由負分開始，要付出雙倍努力先得！」

好志在血汗錢

初入行時，Juno屢遭針對和抨擊：「依家已經少咗好多，出道嗰陣『槍林彈雨』，我當時性格比較收埋自己，好少講嘢，外人會將佢哋主觀意見，投放喺我身上；不過隨住時間過去，依家啲人反而覺得我係屬於少說話多做事，係觀點與角度嘅問題。（因難聽說話而喊？）冇！真係冇！我係心平氣和嘅人。」Juno的座右銘是「少說話、多做事」：「我唔會自怨自艾，我覺得人夾人緣，正如我有鍾意睇嘅電影，人係有權選擇自己鍾意嘅嘢。」

很多人覺得Juno對娛樂圈「唔志在」，但他反駁：「唔係呀！比如我出席代言活動，人哋畀酬勞我，我係好志在，因為係自己賺番嚟！」沒錯，Juno確實要付出雙倍的努力，以實際行動去告訴別人，他對演藝事業是相當專注和投入。Juno的工作態度認真又搏命，試過因拍戲令耳朵受傷流血，但他沒有怨言，沒有呻「有自唔在、攞苦嚟辛」，因為他真的享受工作樂趣。

自嘲變種宅男

Juno是樂壇少有的乖孩子，出道至今緋聞並不算多，也甚少被拍到夜蒲，他自爆最愛留在家中，還自嘲是「變種宅男」，他說：「我唔鍾意出去玩，可能性格問題，我唔屬於好動嘅一群，當然有朋友幫我搞生日Party，我都會出席。」幼承庭訓，家人教他要待人以禮，Juno說：「家人教我對人要有禮貌，同埋互相尊重，呢個好緊要，我同傳媒關係幾好，有啲嘢唔知，就真係冇理由作個答案答你，大家都係為工作啫！」

談及親情，Juno表示家中三個男人，包括父親、哥哥及他都各有各忙，努力爭取喜歡的東西，他說：「我哋唔係靠祖蔭，係白手興家努力去賺每分每毫。」孝順的Juno又表示，每星期都會回家飲湯：「每個星期盡量返去兩次，飲媽咪煲嘅湯，我都擔心媽咪有時會好寂寞，所以會多啲返去陪吓佢。」

拍戲自由發揮

Juno最近確實忙得不可開交，既要宣傳新戲《維多利亞壹號》，又要為新曲加精選宣傳，認真頻撲！不過，Juno卻樂在其中，談及電影和音樂創作，他更是滔滔不絕地說：「彭浩翔導演係一位好好嘅伯樂，電影《破事兒》嘅角色，令我多咗電影發展空間，直到《維多利亞壹號》同埋《剖術者》，都係兩部好好嘅電影。我喺呢幾部戲都有唔同嘅角色，啲人可能會有疑問，以我嘅家庭背景演呢類角色，會唔會唔夠說服力呢？但係我想講作為一個演員，最緊要係做得神唔神似、演技好唔好，唔可以同家庭背景相提並論。」Juno感激何超儀的賞識，他說：「佢係好朋友同好老闆，畀好大自由度我哋，能容納各式各樣嘅電影。」