無綫新紮咪神高海寧、王君馨及李治廷昨日出席足球電玩遊戲活動，兩女不約而同大晒4吋「事業線」，但論豐滿程度，似乎高海寧稍勝一籌，期間大會安排她們與李治廷合照，只見在旁的李治廷卻硬軚尷尬，除了不敢直視打扮性感的她們外，雙手更全程攬實足球，場面惹笑！

李治廷站在高海寧（左）及王君馨身旁硬晒，全程拿着足球，目不斜視。

高海寧狀態大勇，騷盡天賦本錢重奪「咪神」寶座。

對於李治廷的怕醜表現，高海寧笑不攏嘴地說：「哈哈！佢都好Nice，頭先我搭住佢膊頭勾腳影相，佢仲話辛苦我添！」問到誰較性感時？早前在港姐招募活動中獨領「峰」騷的王君馨笑說：「大家都好靚，係健康性感！（行性感而多咗工作？）我不嬲都因為跳舞關係啫！冇話因為身材而接多咗Job！」

減磅立即退位

對於同樣被封為「咪神」，她們即相視而笑，還互笠高帽一番，王君馨更大讚高海寧較適合當「咪神」：「佢身材又靚又均勻，反而我就因為工作而肥咗，連帶上圍都豐滿咗，如果遲啲減磅就會退位！」而高海寧則笑指站於王君馨身旁倍感壓力：「佢之前喺港姐活動，個個都讚佢着得靚！」

唔識安慰「細佬」

此外，剛奪得金像獎「最佳新演員」的李治廷坦言，獲獎後壓力增加不少：「多謝今年同上年支持同提攜過我嘅人，我唔想辜負佢哋嘅期望，所以以後要做得更加好！（『細佬』鍾紹圖輸咗唔開心，會唔會借個獎畀佢擺吓？）咁仲衰啦！我都唔知點安慰佢，不過佢仲細，第時大把機會啦！」