現年43歲的周海媚（海味），年前轉戰內地發展，劇集、廣告接踵而來，短短半年已穩袋逾千萬人仔。事業愛情同樣得意的她，雖然工作排得密密麻麻，但最近有傳她下嫁拍拖六年、有「翻版劉翔」之稱的內地圈外男友。

周海媚日前出動Shopping，主攻金飾，大有收穫。	放大圖片	揀選金飾期間，周海媚心情大靚，經常笑容滿面。

日前約下午4時半，記者在中環遇見剛從內地返港放假的海味，她與一名女性友人到ifc Shopping。戴上太陽眼鏡的海味，於商場逛了一會已大有斬獲，期間她人有三急，急步到附近洗手間解決，隨後再出動血拚，手持大袋戰利品的海味，輕鬆逛一會後，與友人到咖啡店用餐，順道坐低抖一抖。

行到攰攰哋，海味與女性友人一齊到咖啡店醫肚。

海味匆匆去洗手間後，便再投入Shopping。

鍾情公仔吊墜

醫肚後的海味當堂生猛晒，還意猶未盡繼續閒逛，當行至附近一間首飾店時，二話不說入內選購，她先後挑選了金鏈、金吊墜及耳環，見她對公仔形狀的吊墜情有獨鍾，又不時拿上手細心研究，友人則在旁給予意見。逗留約20分鐘，海味便扑錘買下一個數千元的金吊墜，及後繼續在附近幾間時裝店睇衫，但逛完一輪仍未揀到心頭好。

當記者上前打招呼拍照時，海味起初顯得愕然，但後來亦友善企定定微笑拍照，問到買金器是否準備結婚？她即說：「唔係，我自己戴啫！」當再追問是否好事近時，她只笑笑口說：「我冇講過，你哋講之嘛！」然後便轉身入(車立)走人。