李彩華（Rain）同舊公司嘅合約搞咗好耐，早排佢自掏腰包七位數字解約，件事終於告一段落。據小小So所知，原來佢諗住一月就可以搞掂，點知到過年都未處理好，所以Rain索性喺立春前，搵咗位師傅去屋企擺陣睇風水。
小小So：你搵咗師傅擺風水陣？
Rain：係！立春前搵師傅睇過間屋，我屋企客廳有條橫樑，師傅叫我喺橫樑一邊擺「水種觀音竹」，另一邊就擺「土種小白菜」，佢話咁擺法會幫到我，仲話三月一定搞掂合約嘅嘢，點知真係掂咗，好神奇！
小小So：你好迷信？
Rain：依家冇咁迷信，以前我成日睇相或者塔羅牌，都係為求心安，有時有啲識睇相嘅朋友，都會贈我幾句，佢哋話我近排氣色唔錯，發展都幾順利，令我好開心。