青海玉樹縣日前發生大地震造成死傷連連，令無數災民痛失家園，損失無法估計，連日來演藝界以不同形式進行募捐，而今日香港演藝界則假紅館舉行《演藝界情繫玉樹關愛行動大匯演》籌款活動，逾三百名兩岸三地藝人參與，計有成龍、容祖兒、霆鋒、何韻詩、Twins、張靜初、溫拿樂隊和陳寶珠等。
為「大匯演」拍攝片段的莫少聰和張家輝等人，前日到西寧探訪當地災民，兩位男士外表堅強，但面對小朋友痛失雙親成為孤兒之慘況，亦為之動容。他們又親睹不少協助救援的人員，因過於勞累而有高山症反應，紛出現肺水腫，需臥床等待救治，幸而家輝事前服了行氣活血藥，故坦言「老虎都打死幾隻」而完成任務，莫少聰則曾到當地拍紀錄片，故有經驗亦避免「出事」。
景象殘酷令人心傷
前日清晨便出發的家輝，用了十多小時的探訪，他坦言印象難忘：「係想畀關懷啲災民，我去咗幾間醫院探訪，仲同一個妹妹影相，佢笑得好開心，但背後佢親眼見到意外發生，估計雙親都罹難，所以四日都冇講嘢，所以我同佢講嘢都好小心，唔想觸及佢傷痛回憶。（有咩難忘經歷呢？）我好細膽，同行有人入ICU探訪，出番嚟後佢話好彩我冇入去，因為入面唔係斷手就係斷腳，好殘酷嘅景象，不過，我都會盡量趕返嚟出席《大匯演》，將感受同大家分享。」
同行的莫少聰因曾到西寧而有經驗，故避過高山症反應，所以全程由他負責拍攝：「其實當地物資最缺係帳篷，雖然連日軍機都送咗好多到場，但傷者不斷送到西寧聚集，又見到好多志願者同孤兒嘅慘況，佢哋有高山症反應肺水腫瞓晒喺度。（有冇喊呀？）好感動，覺得自己只係出一分力，但感受到民族團結同社會和諧。」
由於今次出席人數甚多，預計亦吸引大批Fans到場，大會為尊重活動主題，呼籲Fans不要拿燈牌及支持偶像的橫額，出席者盡量穿黑、白、深藍及灰色服飾，所有入場觀眾最少捐款一百元。
今日香港
日期：26/4
地點：香港紅館
出席藝人：兩岸三地藝人紅星為主，包括容祖兒、成龍、張靜初、徐熙媛及徐熙娣等
性質：籌款表演