夏韶聲將於下月13日在紅館開騷，廣邀各方Band友做嘉賓，實現多年的音樂夢想，入行41年的夏韶聲說：「做咗咁多年音樂，表演盡量希望做到有意義，好想介紹香港Band壇發展史，呢種形式以前未有，將來有冇人號召我唔知，我唔敢講功德圓滿，但有能力就要做。」
本來夏韶聲前年有機會在Star Hall開騷，但因受傷取消，延至今年才搞，更升呢到紅館，他說：「好多Band友前輩未喺紅館做過騷，雖然有啲肥咗，有啲甩頭髮，但搖滾精神仲喺度！（邊個前輩做嘉賓？）保持神秘，只可以講平輩有玉石樂隊，後輩有LMF。（LMF唱粗口歌？）美國周街都係粗口，只係反映文化。」
