自小已萬千寵愛在一身的歌手羽翹（Ava），最愛扮靚及拍照，而且相當頑皮，經常偷用媽咪的化妝品，當作畫具畫畫，她笑說：「媽咪好貪靚，成日將我打扮得靚靚先出街，除咗着裙同戴頭飾之外，顏色亦要襯到絕，總之就要求好高啦，哈哈！」

羽翹是家中獨女，難怪爹哋錫到燶！

羽翹去年開騷，父母結伴捧場。

拒着褲睇煙花

由於被媽咪「襯慣」，羽翹自細養成襯衫的習慣，更視裙子為出席重要場合的服飾：「細個喺長洲住，每次爹哋媽咪帶我出香港，我都一定要着裙，唔肯着褲o架！最深印象係每年農曆新年大年初二都會去香港睇煙花匯演，我一定會着裙去！」她笑言升上小學後，即使天氣冷，不少女同學都改穿長褲，但她依然抵冷着校裙：「事隔咁多年，即使長大成人，我依家都係最愛着裙，習慣冇變過！」

羽翹貪玩又貪食，是個小小百厭星。	小羽翹自細已愛着裙，相當貪靚！	羽翹小時候已懂擺甫士，甚有「模」格。