模特兒陳沛嘉（Balia）老公彭文堅之前畀人影到同一位異性行為親密，令人以為佢哋婚姻有暗湧。不過，其實小小So知道佢哋兩公婆仲好恩愛，近年少咗接模特兒工作嘅Balia最近努力進修自我增值，每星期都會搵人上門教琴，佢話：「我以前讀書已經好想學鋼琴，但係媽咪好嚴格，想我專心讀書，所以唔畀學，依家大咗，有時間咪學囉！當還自己心願。不過，真係好難，唔知係咪年紀大咗，手指冇咁靈活呢？」Balia仲話想秘密練一首歌，送畀老公做生日禮物，認真Sweet到暈！
小小So又知道除咗學琴之外，身為上海人嘅Balia仲努力學緊上海話，佢話自己識聽唔識講，所以想學吓家鄉話，咁第日返上海就可以大派用場啦！認真好學不倦！