不少藝人愛炒作緋聞谷人氣，但Mandy絕對不是當中一員，出席活動時其實不大願意提及感情事，講一、兩嘴算是盡力接招，她淡淡地說：「我唔會特登隱瞞一樣嘢，人哋問到就講少少。」上月25歲生日，柏霖隔空傳短訊祝福，問到兩人會否關心對方感情新動向，她說：「我哋係好朋友，好支持對方，到今日都係。」

愛情：藕斷絲連

也許有人會將舊愛與敵人畫上等號，但這條方程式在Mandy的方格簿上從不存在過：「我每一次都可以Keep到做朋友，我覺得同一個人拍拖佢唔單止係Lover，兩個人一齊已經Build Up咗一個Connection，分手後唔會唔見面，至少喺我小世界入面唔係咁。」

問到單身的Mandy是否身心都已準備好投入新戀情，她搬出穩陣答案：「一切感情事隨緣。」對於擇偶條件，她說：「我對於外形、性格方面冇特別要求，人同人係隨緣，你Force唔到對方有你心目中想要嘅特質，有就有，冇就冇，我覺得最緊要係有Connection。」至於能否再接受Long Distance戀愛的挑戰，她說：「Long Distance除咗要有Connection（連繫）外，仲有好多嘢要兼顧，都係幾難嘅，下次我有呢個經驗再答你啦！」

工作：隨遇而安

工作從來不是Mandy要費心的一環，精緻的面孔、亮麗的外表，就像上帝早就為她築好一條天橋，只待她踏上去搖曳生姿。她不只一次在訪問中表示自己是幸運兒，十多歲在馬來西亞讀書時已兼職模特兒，十八歲抱着遊歷大世界心態來港，她用的字眼是「有Job做就做」，身邊帶着自己賺的錢用作「Support Fun In HK」。就是這樣隨遇而安，抱着大無畏精神的Mandy，來港不夠一個星期已接到工作，備受幸運之神眷顧。

03年香港遇上SARS大災難，全城一度恐慌，算是她遇到過的小小難關：「當時好多Model都走晒，我選擇留低同大家共度時艱，我覺得要發生嘅事總會發生，自己戴口罩、做足防護措施就唔使驚。因為唔夠人用，工作量反而有增無減。」

朋友：傾得就傾

有人的地方很難找不到是非及搞小圈子，在娛樂圈自然更甚，不過Mandy揚言從未遇過小圈子：「喺後台個個Model都傾得好開心，講Fashion講衫講扮靚，簡直好似開Party咁，爭在冇薯片啫！可能平時大家都要周圍飛，冇乜機會約出嚟，一齊做嘢就當係Gathering（聚會），傾得就傾。」

每年Model界冒起的新面孔就如雨後春筍，她對芸芸新人持開放態度，更指有錢齊齊搵最開心：「錢係搵唔晒嘅，每一個Model性格、Selling Point都唔一樣，啲客有多啲Choice去揀Represent（代表）自己牌子嘅面孔係好事。」每次見到新人加入，她猶如尋回幾年前的自己，不期然為她們默默「加油」：「入行後經歷嘅所有嘢我都覺得好Lucky，都想人哋可以感受到香港嘅熱情同文化，有錢大家搵真係最開心！」

家庭：最愛契媽

Mandy自小由契媽湊大，契媽的地位是無人可代替：「由細到大佢都支持我，無論讀書、學琴、工作，佢會為我打氣，唔會畀壓力我，反而我追求完美，事事希望做到200%，會畀壓力自己。佢唔單止係媽咪，仲係好朋友、最信任嘅人同知己，我開心唔開心都會同佢講。我最欣賞佢就係從來唔會去Judge人哋，我做嘅嘢，佢有Advice（忠告）會畀，唔明白嘅就純粹支持我，我真係好欣賞佢呢個Quality（質素）。」

問到曾送甚麼給契媽表愛意，她說：「佢自細教我物質唔重要，我哋嘅關係唔需要物質去Support，有嘅係無限嘅愛。」當年她決定隻身來港發展，契媽全力支持，現時相隔兩地，每日除傾電話外，每逢節日她都會抽空返馬來西亞探契媽：「佢知我掛住鄉下，每次返去都會預備一罐自製辣醬畀我帶返香港，佢有時嚟香港探我，都會帶一罐，等我解鄉愁，佢真係好錫我！」

後記：大Model零架子

早在03年出道的Mandy Lieu名氣自然不小，當日下午她在中環Soho區的餐廳邊吃午飯邊接受訪問，吃畢主菜後餐廳主動送上精緻甜點，喜孜孜的Mandy不忘向服務生連聲「Thank You」，然後一臉滿足的細細品嘗。靚女又零架子，難怪Mandy今人如沐春風！