今年40歲的鄭嘉穎，已屆適婚年齡，雖然早前與佘詩曼緋聞傳得熱烘烘，但無疾而終，最近阿佘身邊換上另一位男主角陳豪，嘉穎笑說：「其實睇吓邊套劇出街咪傳邊個，唔傳我就傳陳豪。」問到有沒有因「失戀」感覺酸溜溜？他說：「冇，甜到不得了，下次睇廖碧兒（陳豪緋聞女友）啱唔啱我？有機會都想同佢合作兼傳緋聞。（之前你提起阿佘會黑面？）寫啫！我都冇黑面，可能我塊面曬得黑，唉！我之後Keep住唔好曬咁黑，連妝都要化淡啲。」緋聞過後，嘉穎似乎一身鬆晒，可以肆無忌憚用來開玩笑。
緋聞：避無可避
不少人認為緋聞是在娛樂圈生存的附帶品，嘉穎直言避無可避：「緋聞係可以Keep到人氣，但只屬紙上明星，紅唔紅最終都要睇個人表現，一單緋聞炒得幾耐？搵你做幾個Job又可以食幾耐？只靠緋聞好快被人淘汰。」對於相繼有藝人被揭瞞婚，入行十多年仍堅持是單身的嘉穎表示，未到結婚一刻都不會公開另一半：「有人話過我為怕影響事業所以唔公開認拍拖，其實我都想搵個合適對象，但如果係圈外人，一定頂唔順畀人指指點點，圈中人又怕被緋聞掩蓋工作，所以大家唔好阻我、唔好搞我，畀啲空間我發展。」
他又列出擇偶條件，不設年齡下限：「兩年前阿媽叫我要生好快啲生，趁仲幫到我湊仔，可惜我仲未結婚，哈哈哈……所以冇得急。（細你十幾年嘅模都得？）年齡唔係問題，主要睇夾唔夾，不過大過我就抿啲，怕生唔到。」
無綫最近因有高層涉貪污，令不少藝人牽涉其中，並將他們分黨分派。一直被指是「樂易玲派」的鄭嘉穎，08年拍攝《烈火雄心3》時與「志雲黨」的王喜鬧翻，有指二人成為兩大巨頭的角力籌碼，如今陳志雲失勢，嘉穎自言無黨無派：「總之我係TVB派，如果你冇表現，邊個睇你都冇用，TVB係上市公司，唔會養一個冇用嘅人。」但與王喜的不和傳聞，他卻暗露玄機：「我拍過十幾廿部劇，咁耐只有一套劇傳不和。（唔開心？）事情已經過咗咁耐，但拍攝過程，係我拍咁多部劇以來最唔開心一次！」
嘉穎承認與高層熟落，有甜也有辣：「有好多嘢易開口啲，例如傾合約，會試吓可唔可以傾高啲……哈哈！最後當然係公事公辦啦！至於唔好嘅地方係別人會標籤咗你，無論你做得有幾好，總覺得你同高層熟落、關係好，完全抹殺咗當事人嘅努力。但某程度上，我覺得機會係人畀，但把唔把握到都要靠自己。」
演技：不斷增值
06年的《萬千星輝頒獎典禮》譜寫了嘉穎人生光輝一頁，他的努力終於得到回報，憑《天幕下的戀人》初登「最佳男主角」之位，但與此同時被外界批抨演技欠火候。為擺脫「天幕」框框，他嘗試演出不同角色，做過《通天幹探》的大奸人，又演過《與敵同行》的踩界角色，最近在新劇《鐵馬尋橋》中更一人分飾兩角，他認為演員要不斷自我增值：「每拍一部戲就多一次經驗，之前有跟詹瑞文上堂，唔係覺得自己演得唔夠好，而係一個好嘅演員唔會永遠停留一個位，需要不斷Input，讓自己進步。」
家人：感激媽媽
在訪問過程中，嘉穎多次提及年逾七十歲的媽媽，他直言沒有她支持，也沒有今日的成績。嘉穎憶述97年在台灣的一段辛酸歲月：「當年去台灣發展，出完第一隻碟，諗住好快出第二隻，點知一個金融風暴，令我等吓一年又一年，等到99年都係等。嗰兩年係我人生最慘嘅時候，港台兩邊走，當年台灣好流行唱校園騷，但騷錢近乎零，只係叫做有得曝光。」
入不敷支，堂堂大男人要攤大手板問媽媽攞錢，心裏自不是味兒；但媽媽為支持兒子「理想」仍無條件力撐，他感激地說：「阿媽叫我轉行，叫我返美國讀埋仲差一年就畢業嘅土木工程學位，但自己太執着，我唔想喺最谷底嘅時候走，我唔想被人淘汰，唔要揹住『失敗』兩個字轉做其他行業。」
回報：捱出頭來
當年戴思聰一手帶嘉穎入行，其後因「長命約」而鬧翻，但嘉穎無悔加入娛樂圈：「當年我未讀完大學，係戴老師叫我快啲入行。其實我當年都唔細，只係嗰段時間爸爸啱啱過身，我好想快啲出嚟搵錢，又鍾意唱歌，所以要硬撐落去。」
現在嘉穎總算捱出頭來，在無綫穩坐一線小生之位，經濟上也能滿足媽媽要求，他自豪地說：「依家阿媽好開心，起碼唔使擔心我，算放低咗個包袱，仲有回報添！起碼每個月零用錢都OK，我只欠阿媽一層樓，但現在樓價超高，我會繼續努力！」
後記：不甘被中傷
一向走靚仔小生路線的鄭嘉穎，曾惹來不少花邊新聞，但都能一笑置之，唯獨一次令他動了「真火」，他說：「花邊新聞有真有假，如果唔係太離譜笑吓就算。但有次雜誌寫我出席活動時態度勁差，令客人誤以為我好難搞，直接影響我收入，同律師研究過出律師信，但話佢哋寫得太有技巧，所以告唔到。」