早前北上拍劇搵真銀的李逸朗，近日終於回港炮製全新國語專輯，他挑戰《明星大起底》時，竟自爆首次睇鹹書時只得6歲，而且過程還相當搞笑！
問題：幾時睇第一本鹹書？
「我記得！嗰時係6歲，因為我喺屋邨長大，細個成日走上山度玩，有日見到有好多鹹書亂咁放晒喺度，不過當時咁細個梗係唔識欣賞啦！我仲好似喺屋企咁，將啲鹹書疊番整齊，放上去鎖住消防喉嗰個箱上面，不過下次去玩嗰陣已經唔見晒啦！」
問題：有冇偏食習慣？
「基本上只要背脊向天嘅嘢都會食，不過我記得有次喺內地，同個活動嘅老闆去慶功，佢叫咗碟白色一條條嘅嘢，仲要係冰鎮嘅，我以為係鵝腸，點知原來係『沙蟲刺身』！我仲食到佢啲吸盤，以後都唔敢再試！」
問題：有冇試過因為打機，幾日幾夜冇瞓覺又冇食嘢？
「梗係有啦！有次喺屋企食完晚飯開始打機，大約夜晚八點度，諗住打到凌晨兩點就瞓，因為第二日下午三點半先開工！當兩點嗰陣，我就諗其實都瞓唔到咁多，不如打多陣，之後就到朝早6點，雖然有啲攰，但係覺得都係瞓四個鐘啫，可以再玩多陣喎，結果我打到下午兩點半，足足打咗18個鐘！最後我冇整頭又冇化妝咁去做嘢，所以我依家已經掉晒啲遊戲機喇！」
問題：如果發現只剩番一個鐘頭命，你會做啲咩？
「我會去搵最愛嘅人，講畀佢知我得番一個鐘頭命，可能佢會傷心，但係我覺得要交代清楚，或者佢好冷淡呢！我又冇咩身後事要準備，因為我做嘢鍾意日日清，如果依家死我都可以，雖然未至於冇遺憾，但係我嘅遺憾應該算少。」
問題：會唔會攰到唔沖涼就瞓覺？
「會！以前我開酒吧嗰陣，收工已經天光，而且唔多唔少都會飲咗酒，好多時真係打開屋企道門，就可以即刻瞓低，我仲因為咁買咗張地氈，如果唔沖涼就瞓地氈，絕對唔會瞓上床！我最高紀錄試過40幾個鐘冇瞓，因為連續拍嘢又要錄音，返到屋企即刻連瞓11個鐘！」