名模Lisa S.的婚紗出自本地著名設計師何國鉦（Dorian）的手筆，Dorian透露約三個月前Lisa找他設計婚紗時十分緊張，還事先講明不能向外透露：「佢話明唔講得，仲要我簽合約，要做保密工作，要保障佢哋自己，本來仲話唔可以畀我公司人知，要守口如瓶。（婚紗係咪Lisa設計？）佢只係同我講要簡單，我設計畀佢睇，佢就話OK，佢本來諗住連婚紗都唔着，我問佢點解乜都唔使準備，佢話今次只係好親密嘅朋友同屋企人去，佢有叫我去，我好遺憾有嘢做去唔到，但遲啲會喺香港搞個大派對。我都好戥佢開心，佢話喺南非結婚係佢夢寐以求，而且又係佢同Daniel（吳彥祖）定情嘅地方。其實一月時Lisa話退出唔做模特兒，好多人都估佢係咪結婚，有好多人問過佢，佢都唔講，今次保密工夫都係做得好好！（Lisa係咪有BB？）一定唔係，但我知佢都好想有小朋友。」而吳彥祖的新郎啡色禮服則在Sam's Tailor以四天訂造。