Lisa S.和吳彥祖在南非結婚，圈中人紛紛送上祝福。
高海寧：「我都係睇郭富城個微博先知，祝福佢哋白頭到老，快啲生仔女。（你幾時結婚？）我冇咁快啦！都唔會有咗BB先結婚，我要BB喺完整家庭長大。」
楊秀惠：「我唔識佢哋，但試過同Lisa S.同場出席活動，如果係真嘅真係恭喜佢哋！」
周家蔚：「之前見過佢哋但未有所聞，戥佢哋高興，我結婚會公開，唔會刻意收埋，但唔覺得需要同人交代。（催婚？）阿媽覺得要大個啲先，希望我以事業為重，我要話畀人聽唔係淨係識拍拖，仲會拍劇。」
傅 穎：「吳彥祖係大家心目中嘅白馬王子，聽到佢結婚都戥佢好開心，自己都諗幾時輪到我呢？雖然我事業心好重，但又想搵個人依賴吓，希望嗰個人快啲出現啦！（南非結婚？）我結婚都唔想大排筵席，去小島結婚都OK。」
陳敏之：「佢哋係金童玉女，之前聽過吳彥祖話會放假一年陪Lisa.S生仔，真係夠晒體貼，其他男士都應該效法吓！但自己結婚都會揀低調。」
馬德鐘：「依家啲Fans好成熟，唔會因為偶像結婚而反感，相反結婚可以吸納新Fans，絕對係好事。」