拍拖八年的吳彥祖（Daniel）與Lisa S.近年屢傳婚訊，兩人於四日前出席《Hope And Glory》開幕酒會時，Daniel揚言結婚一定會公開，還理直氣壯反問為何要瞞婚：「有乜好秘密？我哋都一齊咁多年！」言猶在耳，昨日爆出他與Lisa早於本月六日在南非秘密結婚，證明Daniel擘大眼講大話！兩人瞞婚工夫做到足，連兄弟連凱及陳子聰等亦懵然不知，見證婚禮的圈中人只有擔任伴郎的尹子維及伴娘Ana R.，他們的養女Poulee亦有出席。

花七十萬請親友

據知，Daniel設法將婚事瞞天過海，籌備婚事至七七八八才通知親友，嘉賓名單亦經過嚴選。今次婚禮費用全由Daniel支付，包括每位賓客逗留當地約一星期的機票及旅費，單是請嘉賓費用已達七十萬。瞞婚後，為免好友「詐型」，兩人昨日才在網誌上載《My Wedding》及《We Did It》的文章，以及婚照「補鑊」，他更冧爆叫Lisa做「My Lovely Wife」。當日穿上西裝的Daniel，與穿上白色婚紗的Lisa在森林內舉行結婚儀式，他更自爆感動得流下男兒淚。兩人邀得南非宗教界人士Monica主持，跪在氈子上接受高人祝福，甜蜜地交換戒指後正式結為夫婦。

Daniel形容婚禮是人生最難忘一天：「我同Lisa喺一個好靚嘅森林結婚，感覺到一種好奇妙同強烈嘅能量同埋愛，永遠都唔會忘記！」他還表示婚禮前一刻還下雨，至正式舉行時突然放晴：「Monica嘅十四個徒弟唱歌同跳舞，又向祖先祝福我哋嘅婚事，其中有徒弟好似被催眠咁，話睇到我哋嘅將來。呢個小小嘅森林好似歌德式中世紀歐洲建築風格教堂，儀式後返入村食羊宴，呢日真係好特別，我依家係已婚男人喇！」至於榮升吳太的Lisa亦開心地宣布婚訊，覺得婚禮美麗又純潔：「我唔能夠想像有其他更好嘅結婚方法，呢一日係我人生中最開心嘅一日！」

約伴娘開心行街

昨日記者致電擔任伴郎的尹子維，對於Daniel瞞婚，他只表示知道老友邀請的名單不多，榮幸有份參與：「Part Part都好感動，過程好特別、好有氣氛。（送乜禮物？）送咗首詩畀佢哋，係我對佢哋拍拖相處嘅感覺，亦有啲禮物就準備緊。（幾時送？）適當嘅時候送囉！」伴娘Ana R.亦在Facebook祝福一對新人，但未有指名道姓，直至記者致電才說：「我係預先知道要去南非參加婚禮，最難忘係Lisa翹住爸爸行入嚟，然後將佢交畀Daniel嗰刻，我差啲想喊！」另外，前日Lisa S.與Ana R.被發現到時代廣場的連卡佛女裝鞋部Shopping，只見Lisa全程陪好友睇鞋，自己坐在一旁等電話。當發現記者時，Lisa仍心情大靚兼舉起V字手勢，但未有斬獲。吳氏夫婦稍後亦會在港舉行結婚派對，但時間與地點仍未決定。

對於兩人在南非森林舉行婚禮，並由當地的宗教界人士主持儀式，謝偉俊律師指只要儀式是當地法律認可，法律上已成為合法夫妻，亦會受到國際包括香港法律認可。

吳彥祖

年齡：35歲　身高：186cm

簡歷：三藩市出生的吳彥祖，畢業於美國俄勒岡大學建築系，97年來港任模特兒及拍電影，04年憑《新警察故事》奪得最佳男配角。

Lisa S.

年齡：32歲　身高：178cm

簡歷：身為中法混血兒的Lisa S.，父親Gary Selesner是拉斯維加斯凱撒皇宮主席，雖家底豐厚，但她卻不靠父蔭，獨自來港發展天橋事業，今年已宣布轉戰司儀界。