甄妮嚟緊5月開告別騷，小小So同佢傾開有關演唱會有乜睇頭，講講吓就講到佢投資咗成四千萬港元，喺台灣桃園龍潭嘅農莊「西土瓦」。一講到農莊，甄妮就變得好興奮，佢強調農莊嘅農作物全部都係有機栽種，因為農場係零化學用品，唔會用農藥滅蟲，就連啲雞鴨羊都零舍健康。
小小So好疑惑，唔用農藥，咁點樣殺蟲？甄妮就話：「用手囉！我會同啲蟲蟲講數先，叫佢唔好再嚟食我嘅農作物，如果啲蟲蟲唔聽話，我咪逐條用手按死佢哋囉！」
甄妮仲話為咗搞好農莊，50幾歲人重返校園讀書，因為喺台灣開農莊要攞證書，又要學好多種植嘅知識，甄妮問：「知唔知點去救一棵有病嘅樹？」小小So話：「斬咗佢，再等佢生過？」佢聽到就好心痛咁話：「梗係唔係！係幫佢吊鹽水呀，係咪未聽過呢？」多得甄妮賜教，小小So又學識多一樣嘢！