幾乎每年也有作品入圍電影頒獎禮的方中信，憑《竊聽風雲》提名今屆金像獎「最佳男配角」，片中飾演竊聽小組成員，雖然角色並非很突出，但對於擅長演警察人物的他來說，絕對手到拿來，所以輕易打入男配角最後五強。

輕鬆心態觀戰

芸芸對手中，方中信認定自己不會跑出，故早已抱輕鬆心態觀戰，誰的勝算高心中有數：「霆鋒今次喺《十月圍城》入面表現唔錯，佢靚仔又有型，肯剃頭已經係好演員表現，成功咗第一步，同埋佢都幾打得，仲要演一個低下層車伕，發揮得唔錯。」

談到他與家輝均降級爭獎，若然跑出豈不是有點蝦細路感覺？方中信亦大表認同：「再畀梁家輝攞就有啲膩，佢都係影帝，根本就超晒班！我攞過就算，馮淬帆唔係話佢唔好戲，但今次應該係畀霆鋒嘞！」

把握每個機會

對於「影帝」的稱呼，方中信認為只是名字旁多加副助詞，笑言即使榮升影帝，工作量也如以往般不過不失，連酬勞也沒有大幅度增加，更以「高不成低不就」形容自己：「我從來冇諗過要大紅大紫，只要有得開工咪把握每個機會，收入足夠養活老婆同個女，對我嚟講都叫做有個交代。」

而於內地叫價甚高的方中信，劇集和電影一套接一套，雖然收入不錯，但已為人父的他不諱言心情矛盾：「內地的確機會好多，但有時一留要留幾個月，真係幾掛住個女o架！以前我飲嘢去到半夜，依家連夜街都少出，最遲十點幾就返屋企，所以好多朋友都離我而去。」