許冠文暗寸冇良知

另外，昨日香港《壹週刊》指許冠文背着太太「偷食」在西貢攬女，記者就此事致電許冠文，由許冠文太太接聽，並幫老公澄清，她笑說：「侮辱咗佢（指許冠文）嘅智慧，佢若果偷食嘅話，會唔會喺西貢咁多人嘅地方拖住第二個呢？只要分析一下，都知冇可能，成件事得個講字，只係得一張坐喺車頭嘅相，就作到咁誇張，嗰位女士係我哋嘅朋友嚟，係上海一位作家，嗰晚只係盡地主之誼請佢食餐飯，唔明點解作到咁大！」

其後，許冠文接過電話說：「我平時好少去評論呢啲新聞，但今次太離譜，話我偷食，但係就一張相都冇，完全齋講，搞我太太實在太過分！寫嘅說話斷章取義，我太太只係想引用我Talk Show嘅說話嚟回應，我喺個騷講呢個世界冇完美嘅男人，能夠呃老婆一世嘅男人，都算係咁，個記者就只係寫咗一句，真係一個好大嘅笑話！我希望傳媒寫嘢搵食之餘，都要諗諗狄娜所講，顧吓良知，總之，真的假不了，假的真不了。」