鄭融昨日到商場出席《超級巨聲2壓軸面試》，對於曾任《勁歌金曲》監製的潘裕佳被無綫以「唔夠嘢做」為由解僱，她說：「我冇打電話慰問潘裕佳，佢係我工作上嘅前輩，我會祝福佢工作同生活順利，希望有機會再合作！（點睇佢被炒原因『唔夠嘢做』？）佢好多綵排都跟到足，主動落手落腳做，又會Take Care（照顧）歌手嘅感受，不過人哋公司嘅事，我唔會有咩睇法。」

何韻詩（右）與杜汶澤分享照片，放聲大笑。

被指是「志雲幫」的陳鍵鋒﹐坦言不會探望陳志雲。

黑面拒認「志雲幫」

同場的無綫監製麥鎮東對記者十分避忌，被問到是否「志雲幫」時，他忟憎地黑面說：「我答乜都會扭曲！我同潘裕佳識咗廿幾年好熟，同陳志雲就唔係熟唔熟嘅問題，我哋係下屬，所有監製都要跟佢做嘢！除咗公事外，我哋冇私下約會！（咁避忌係怕影響份工？）我答得你就知我唔注重啦！你可唔可以唔好影相，我唔鍾意宣傳！」

陳鍵鋒劃清界線

此外，曾任《勁歌》主持的何韻詩昨日出席另一活動時說：「我04年做《勁歌》主持而認識潘裕佳，我冇留意佢被炒，私人嘢不便評論，人事變動唔出奇，音樂節目要新鮮感！」至於被指是「志雲幫」的陳鍵鋒昨日到廣州出席活動時，表明不會探望陳志雲，擺明與對方劃清界線。

另外，無綫外事部副總監曾醒明昨日證實潘裕佳離職：「二千幾人嘅公司，每日都會有人加入有人走，佢離職絕對同陳志雲無關。」