減肥係女人嘅終身事業，尤其係明星，真係肥啲都影響上鏡，因為無論真人幾Fit，上鏡望落去都好似肥十磅呀！時肥時瘦嘅鄧紫棋（G.E.M.），相信對呢樣嘢有好深嘅體會同共鳴喇！小小So平時喺公開活動見到佢，佢都冇乜提到自己嘅磅數，只係一時話肥咗幾磅，一時又話瘦番幾磅。佢亦唔會自爆三圍數字，只會話條腰幼咗咁！
不過，小小So有次喺活動見到佢，佢着住件貼身衫喺後台等出場，坐喺度時唧咗個肚腩加一截「車胎」出嚟，唔係肚腩仔嗰隻喎！都咪話唔礙眼，再肥落去，容乜易變米芝蓮㗎？可能因為咁，G.E.M.見到其他人分享曲奇餅時，堅持唔受引誘，全程唔望又唔理，當啲曲奇餅透明，淨係拎住支水係咁飲，睇嚟佢自己知自己事，又開始減肥喇！小小So喺度祝福佢減肥成功啦！