狄娜逝世令人惋惜，其子馬天如飽受喪母之痛，仍不忘照顧愛犬，令人相當動容！
夏雨
「我75年同狄娜合作拍《七彩滿天神佛》而熟落！我哋影咗張合照，佢仲喺後面題首詩送畀我，覺得佢浪漫又有文采！後來我去內地做生意，佢都有介紹啲高官畀我識，不過大家好耐冇聯絡，所以佢病嘅時候我都冇去探佢！佢咁樣離開，當然好可惜！」
楊思琦
「雖然我對狄娜姐姐認識唔深，不過知道佢好有才華、好出眾，離世當然好惋惜！（馬天如不忘照顧愛犬？）呢啲係人之常情！狗仔由細接觸到大有感情，養小動物係一生一世嘅事，唔係話唔開心就可以唔理囉！」
廖碧兒
「狄娜真係一個奇女子，唔會有第二個代替到佢！生命唔在乎長短，相信佢已經做到佢想做嘅嘢，都算係足夠！馬天如媽咪過咗身，可能唔識同人講自己點傷心，動物都係人類嘅朋友，同佢哋傾偈起到安慰作用！」