與馬天如（Michael）相識多年、同樣愛狗的郭秀雲，昨日接受記者電話訪問時表示，Michael現時難免傷心：「狄娜離開前，其實已知道自己唔得，知道所有嘢，連自己幾時走都知！佢走時Michael都喺身邊，所以好安詳！Michael當然傷心，佢一路好低調，佢咁孝順，又同媽媽相依為命，依家咁樣一定好唔習慣、好迷失，所以佢離開香港，想避開吓、散吓心，唔想見報！」

狄娜當年帶馬天如出席活動，見識不同場面。 (黑白圖片)

馬天如喪母傷心不已，難免要離港散心。

郭秀雲讚似007

狄娜離開後，郭秀雲一直與Michael保持聯絡：「我一路有同佢傾電話，狄娜走之前，本來諗住同朋友一齊送花畀佢，仲打咗去花店訂，點知隔一陣收到Michael電話話佢已離開咗，即時要截住啲花，所以好傷感！（後事有咩安排？）Michael好低調，詳情由佢講！」她更大讚狄娜「敢作、敢為、敢認」，是女性的007。

另一邊廂，羅寶文表示因與Michael同樣是愛狗之人，因而變得熟落，她表示狄娜逝世後，Michael亦有致電向她傾訴，問到對方心情如何？她說：「當然傷心！不過我唔方便代佢作答！我知佢好孝順，呢兩年好忙，全心全意照顧媽咪，佢兩個感情好好！（身後事如何處理？）我唔敢問佢，我知佢哋想低調！」她還大讚Michael有愛心：「佢好鍾意狗，屋企養咗好多隻大狗，全部都係領養，就算媽咪嘅事令佢好唔開心，佢都唔會忽略啲狗，愛心爆棚！」