坐擁逾億身家的狄娜（原名梁幗馨）聘用過不少人為她工作，包括御用髮型師、司機、助手及秘書等，當中近身助理伍小姐便跟隨狄娜逾30年，她大讚這位老闆好人冇架子，對下屬相當體貼及照顧。她昨日在電話中坦言對狄娜的離開感到愕然，因為臨終前兩日還到病房探望，當時狄娜精神煥發，完全沒有倦意，更可以起身飲湯及談笑風生。

談起故人，伍小姐語帶感傷的說：「我最後見梁小姐（狄娜）係佢臨終前兩日，當時佢仲係好精神，我仲專登煲咗佢最鍾意嘅木瓜魚湯，識得自己撐起身坐喺床邊飲，佢平時好斯文，但嗰日就戙起隻腳飲咗兩大碗，我仲笑佢話：『你好似韓劇《女人天下》嘅皇后。』佢仲識講笑答我：『我一世都要做皇帝呀！』」狄娜雖然臥病，但仍發揮才女本色，繼續為即將出版的新書《電影—我的荒謬》作最後校對，她說：「我見佢仲搞緊本新書嘅校對，仲諗緊本書出版後反應會點，仲提起好多識咗好耐嘅朋友，估唔到兩日內病情會急轉直下，離開得太快，真係好愕然！」

兒子哭念慈母

至於狄娜的兒子馬天如（Michael）一直與母親感情要好，伍小姐坦言Michael心情至今仍未平復：「梁小姐離開後一晚，我同Michael同佢女朋友出嚟食過飯，感受到Michael好傷心，佢睇到記者會嘅片段同媽咪都忍唔住流淚，喊咗出嚟，佢女朋友情緒同樣低落，但一直喺身邊好體貼咁照顧Michael。」伍小姐表示狄娜一直視Michael的女友為新抱仔：「有次梁小姐唔見我哋，就即刻大嗌，點解個仔又唔見？新抱又唔見咗？其實大家只係喺房外，免騷擾佢休息。」問到兩人結婚是否狄娜最大心願？她說：「唔清楚，因為香港好似未合法，但以我接觸嘅馬天如就好識照顧女人同細心，男人平日表現得好Man，女友就好嬌嗲，感覺同正常夫妻冇分別。」

醫藥費逾千萬

據知，狄娜的醫藥費花掉逾千萬元，雖然狄娜臨終前要求不要舉行公開殯殮儀式，但伍小姐透露狄娜早已有安排：「佢讀書時係天主教，但跟媽咪後就拜神，真係唔知佢咩宗教！呢啲交咗佢個仔同秘書決定，但我同佢相交多年，佢對生死從來冇忌諱，佢本身係一個好有安排嘅人，佢曾經話：『人生點都要死一次，唔想死後搞到措手不及。』所以遺照佢一早自己揀定咗，連平安紙都立好，將生意交畀個仔打理。」伍小姐透露由於近日是復活節假期，所以仍未取死亡證，至於葬禮詳情，她說：「搞唔搞舉殯真係未知！梁小姐好貪靚，之前瘦到得番九十幾磅，所以唔想畀人見到佢遺容，但佢生前最怕蛇蟲鼠蟻，未必會土葬。」