昨日陳慧琳（Kelly）以嘉賓模特兒身份，遠赴北京為德國時裝品牌《Marc Cain 2010北京秋冬服裝》行天橋，同場還有名模張靜與劉丹。以壓軸姿態出現的Kelly，被問到近期頻接Job是否為蝦餃仔（兒子劉昇）將來作打算？她說：「我都鍾意睇時裝騷，簡單又輕鬆。（轉行做Model？）唔夠高。」至於何時生第二胎？她表示言之過早：「我生完八個月，啱啱先收身，傷口要等多一年先得。（叫老公操Fit啲？）會叫佢唔好食煙。（叫佢戒？）好難，但佢都食少咗，我好唔鍾意人食煙，因為好臭。（點鼓勵佢？）如果佢想錫我會話好臭，總之我全間屋都係禁煙。（唔戒煙唔生？）OK啦！我爹哋都食煙，唔食就最好啦！」

劉丹與張靜行騷十分淡定，甚具名模風範。

放大圖片

Kelly笑言來了北京大半日已掛住蝦餃仔：「佢近排笑好多，識聽我哋講嘢！我成日都有播我首《幸福的快車》，佢聽親都笑。」對於近日Sa基的「結婚、離婚」一事成為城中熱話，Kelly表示夫婦間最重要是互相尊重和信任，問她會否擔心老公？她說：「暫時唔會怕，知佢用情專一。（會唔會鼓勵人哋生小朋友？）婚姻唔係用小朋友嚟維繫。（下一胎想生女？）係！」Kelly坦言蝦餃仔重要過老公，但不怕對方呷醋。

浸浴紓緩腰傷

此外，問到內地旱災會否節約用水？她說：「會！（一家三口齊沖涼？）BB唔得，但近排抱仔同跳舞多，傷咗腰，要浸浴紓緩。」她表示生完BB後，對環保意識提高了，更將蝦餃仔的衣服和玩具送給朋友，問到會否安排入名校？她說：「睇吓仔仔嘅能力，我鍾意國際學校，老公就鍾意本地，都怕為個仔將來同老公有拗撬。」另外，擔任時裝騷藝術總監的鄧達智說：「今次唔係以設計師身份，所以連市場學都要顧埋，而Kelly係我請嘅，我哋第三次合作。」