自言很喜歡小朋友的諸葛梓岐（Marie），昨日與師妹鄭文斯一同出席《數碼港BB同樂日》，與BB玩遊戲。大會準備了一幅以Marie與Neway二太子男友薛嘉麟的合成BB相作禮物，但她笑言BB不似他倆：「我生嗰個一定會靚好多同得意好多！」
對於Sa基事件，Marie表示有看該報道：「結婚係開心事，分開係佢哋嘅決定，希望佢哋開心，但都有少少可惜。（佢哋試過唔認結婚！）Artist有好多避忌同壓力，佢哋有共識先咁做。如果我結婚嘅話會公開，想得到大家祝福。（愈來愈多藝人被揭已婚，擔心下一個係陳法拉？）唉！『真的假不了，假的真不了』呢句說話真係好，幾時都用到。」
而陳法拉最近首度為《愛彼錶女皇盃》拍攝宣傳海報，束起馬尾兼穿着度身訂造的銀色連身短裙及馬靴，英姿颯爽地在道具馬上拍攝。由於要擺出策騎姿勢，法拉需趷籮俯身向前，拍攝過程長達兩小時，少點腰力也不行！