歌手周柏豪平時出席活動嘅衣着都好突出，屬於潮人一族，有次小小So喺街度撞到周柏豪，即刻問吓佢對衣着嘅心得，發現原來柏豪有獨特嘅襯衫習慣。
小小So︰柏豪，上次見你做訪問套衫好靚，你平時點襯衫o架？
柏豪︰係咩？其實我冇特別去襯，見到個衣櫃有咩就着。
小小So︰你實有啲襯衫小貼士嘅！
柏豪︰我只係跟我個心情去着衫，因為我鍾意黑色衫，所以我心情好嘅時候就將啲黑色嘢着晒上身。
小小So︰咁特別，但你今日着得好鮮色，心情唔好？
柏豪︰係o架！所以我會將鮮色衫着喺個身度。
估唔到成日笑哈哈嘅柏豪，衣着品味原來咁特別，仲將心情流露喺衣服顏色上，不過就開心時着黑色衫，唔開心時着彩色衫，可謂與眾不同！
