早前台劇《敗犬女王》掀起熱潮，亞視本考慮下月開拍港產「敗犬」劇《鑽石姑婆屋》，並由張文慈、羅力威、萬綺雯及鮑起靜孭飛！不過，隨着亞視老闆出現爭拗，雖然有傳亞視新老闆王征會有新注資，但一直只聞樓梯響，加上其親信盛品儒入主亞視執行董事後，再度重整資金，《鑽》劇隨時胎死腹中！
《鑽》劇女主角張文慈昨日證實，日前已接獲亞視通知指不開拍《鑽》劇，更表示不覺得出奇：「原本公司同我講個劇2月開，之後又押後到3月，然後就4月，早兩日收到亞視同監製電話，話唔拍喇！（失望？）其實改咗好多次，我都唔會有期望，反正我2月已經同亞視約滿，佢哋話2月拍《鑽》劇，我都可以幫手拍埋，不過依家唔拍，我唔會喺度等囉！5月我都接咗電影，但唔排除再同亞視合作嘅！」