鬼妹仔名模Cara G.嚟咗香港已經四年幾，原來佢對中國傳統依然唔多識，有次小小So喺中環撞到佢，見佢對文具店掛出嚟嘅新年掛飾好有興趣，係咁摸兼睇得入神，於是小小So就上前同佢打個招呼，Cara仲好開心咁同小小So嚟個擁抱，跟住指住一串爆竹掛飾問：「呢個係乜嚟o架？咁得意，但我又唔知有乜用？」小小So答佢係爆竹仲攞畀佢睇吓，點知Cara接唔實，將串爆竹跌咗落地，仲即時好驚咁掩住耳仔彈開，原來佢以為個爆竹掛飾係真爆竹，驚佢會爆炸，當佢知道係假嘢之後就話：「嚇死我，我仲以為係真嘅添！」Cara即時哈哈大笑，覺得自己當時好傻，小小So當然都忍唔住笑啦，可見Cara真係傻得可愛又單純。