電視城昨日解封，由汪明荃主持的扮嘢搞笑節目《荃加福祿壽》即進行拜神及錄影，對於陳志雲涉貪案全城關注，阿姐關心之餘亦表驚訝：「我就冇去ICAC助查，亦唔識叢培崑。（聯絡陳生？）冇！唔知真假，要睇情況發展，不過我覺得好驚訝，當時我喺北京開會。（有傳高層收禮物？）TVB唔會嘅，呢度架構健全。（有冇去過高層生日會？）冇！但大家都知道分寸，生日會好難避免，我都會叫同事返屋企食飯啦！（有冇約陳生飲茶？）冇約！不過我見佢出嚟都安心，證明佢自己面對到件事。」

志雲打的出巡

阿姐主持的新節目亦有扮新聞人物，當中包括周秀娜及Lady GaGa等，連阮兆祥亦以阿凡達造型拜神，但阿姐表示《荃》不會擺陳總事件上枱，因首集於本周六播出，相信話題已過氣！問到可有接過叢培崑的思潮廣告制作有限公司安排的工作？阿姐說：「做過舞台劇，但係高志森搵我，係慈善性質，我都冇收錢。（有冇試過被壓價？）唔講啦！其實藝員係有價，但私人幫手都冇所謂。」

同場的王祖藍以一身趣怪造型現身，問到可會扮陳志雲？他說：「暫時冇構思，我哋係以載歌載舞為主。陳生係我好朋友、好上司，都需要尊重，畀啲空間佢啦！我都有SMS佢，但冇覆。（出席高層生日會送禮？）有去，試過有一年送自己隻福音CD。」而志雲雖然傳「失勢」，但昨晚繼續高調「出巡」，他乘的士離家時，大批記者蜂擁追訪。

陳豪否認收視受陳志雲事件影響。	扮嘢能手王祖藍，暫未有計劃扮陳志雲。	陳法拉大受現場人士歡迎。

志雲成為全城焦點，連最近播映的無綫劇《秋香怒點唐伯虎》風頭亦被搶，過去一周收視最高只得32點（約200萬觀眾）。《秋》劇演員昨日出動谷收視，陳豪認為雖有少許風波，但相信不影響觀眾的追劇意欲，為怕騷擾志雲，稍後才SMS慰問。而陳法拉則自稱很慳，只送過一條價值不超過500元的銀手鏈。

阮兆祥扮阿凡達拜神，非常有噱頭！

一班《秋》劇演員落力谷收視，胡杏兒更表演一字馬。