由香港國際電影節協會舉辦的《第34屆香港國際電影節》、《第四屆亞洲電影大獎》及《第八屆香港亞洲電影投資會》，特別請來湯唯及韓藝瑟助陣。兩年前湯唯有份角逐《第二屆亞洲電影大獎》影后，但被指在《色．戒》中露點及歌頌漢奸而遭內地封殺，結果她臨時甩底，昨晚在電影公司老闆江志強、經理人及保安等十多人圍攏下現身會展，出席電影節開幕禮，宣傳開幕電影《月滿軒尼詩》。

鮑起靜讚可愛用功

雖然大會安排混亂，令湯唯要斷斷續續進行訪問，但無損其心情，以花裙配黑色Leggings示人的她，明顯心廣體胖，上台後動靜多多，手指指又交叉腳，問到解禁心情，她未有正面回答，只說：「好開心同岸西合作，我未睇套戲，戲中我飾演孤兒，無父無母，角色性格倔強。（會否返內地宣傳？）要視乎電影公司安排。（接拍內地電影？）交畀公司處理。（被封殺心情如何？）其實事件後我一路有工作、有拍戲，未停過，依家有戲上，特別開心，好高興同鮑起靜、張學友合作，我對新戲寄予厚望。我會專注事業，喺香港拍戲識咗好多嘢，例如茶餐廳『淨飲雙計』，內地唔會有，我覺得香港人好幽默。」

表情豐富的湯唯在台上保持交叉腳站姿，十分有趣。

湯唯與導演岸西見面即抱抱。

至於跟湯唯合作《月》片的鮑起靜說：「湯唯係國際級演員，好可愛、好用功，佢克服到語言障礙，拍嗰時唔知套戲上唔上到內地，依家知道有得上，好開心！」安志杰則說：「拍完戲各有各忙，我又要陪婷婷呢！所以都冇約湯唯，我對套戲內地票房有信心。」

另一邊廂，穿白裙露長腿的韓劇《茶煲阿四》女星韓藝瑟，在工作人員及翻譯陪同下現身亞洲電影大獎記者會，氣質令人眼前一亮。她表示將夥拍Lisa S.及Angela Chow在頒獎禮中任司儀：「第一次以工作性質來香港，可以同唔同國籍人士交流，感覺好刺激！我第一次做司儀，要全程用英文，因為始終唔係我母語，我會Do my best。（拍荷里活製作？）我工作冇停過，四月底會開新劇。（會否發展內地市場？）有機會同好劇本都會試，但我屋企喺韓國，想集中喺韓國先。（你喺北京見過梁朝偉，感覺如何？）我係佢影迷，佢好靚仔，我有睇佢嘅戲，想同佢合作。」