前晚一連18場《Johnnie Walker Keep Walking Duo陳奕迅2010演唱會》正式開騷，除了父母、太太徐濠縈、愛女康堤捧場外，亦吸引容祖兒、何超儀、梁漢文和太太Karen等一班圈中好友撐場，全場「臣」迷座無虛席，難怪陳奕迅（Eason）甫出場即興奮到喊。Eason一貫玩味風格帶動氣氛，卻不慎甩嘴及聲沙，他說：「沙聲唔一定唔好聽，慢慢會成為潮流，不過香港唔興！」令全場爆笑。

帶女兒睇騷的阿徐（中）只顧與何超儀（左）密密斟，懶理老公攬女狂啜。

女舞蹈員從後攬實Eason，動作大膽。

化身哥哥阿梅獻唱

當晚Eason與日籍舞孃的迷情30秒成為全晚高潮，獻唱話題新歌《無人之境》時更被日籍舞孃從後攬實，當他慢慢擰轉身與舞孃情深對望時，更情不自禁嘴對嘴，全場尖叫。坐在觀眾席的阿徐卻一臉不在意，與身旁的何超儀密密傾，Eason還風騷說：「今晚我錫女，第二晚可能錫個男，首歌係講愛係冇錯㗎嘛！可能第四晚有隻狗撲出嚟，咁咪錫隻狗！」其後他又獻唱哥哥張國榮、梅艷芳及張學友等經典金曲，更一人分飾兩角，以男女聲獻唱梅艷芳和張國榮的《芳華絕代》，盡顯唱功。

Eason駕着紅色跑車出場，與打扮趣怪的舞蹈員翩翩起舞。

大批機械人為Eason伴舞，難怪他唱到O嘴。

康堤台下唔理爸爸

除了扮鬼扮馬外，Eason又趁機大晒溫情，他說：「今日父母有嚟，想送首歌畀佢，同埋在座我愛嘅人！」然後他望着老婆和囡囡唱《天下無雙》，阿徐叫女兒向Eason揮手，惟囡囡卻「懶理」老竇。此外，Eason又獻唱緋聞女友謝安琪的《囍帖街》，騷後他接受訪問時說：「唱完呢首接住唱《落花流水》，兩首都係講放下一啲嘢，唔係講感情！有啲人會覺得我好大膽，唱前度緋聞女人嘅歌，唔通吓吓避咩？唔通我以後唔唱《無人之境》咩？」提到不慎甩嘴，他笑說：「30首入面甩3、4首算得乜，我都有啲忟忟哋，但都盡量扮冇嘢。（嘴對嘴？）首歌係講單純嘅愛，俗世人唔需要逃避，我都唔知邊個走埋嚟攬我，我叫佢哋唔好話畀我聽嘅，我唔介意同男仔嘴，最緊要衞生。」