當碧咸都可以「無啦啦」斷腳，幾乎肯定緣盡世界盃，我們發現世上有很多東西都是不能控制的！身為四大唱片公司旗下的陳柏宇（Jason），去年底為無綫到澳門做騷，怎知會捲入近來陳志雲的涉貪風暴？又怎知因「版稅風波」而不能亮相無綫？去年在商場唱《你瞞我瞞》時疑似激凸，他亦無權知道生理何時出現反應……連自己都不能自控的時候，Jason只知自己是多麼無能為力！

面對千百樣突如其來的事件，Jason雖並非單一的受害者，難得他仍可以處之泰然！問到可有被陳志雲公司壓價或被ICAC助查？他說：「廉署由頭到尾都冇搵過我！我從來冇同陳先生間公司合作過，做歌手做好分內事就得，我其實係冇話事權，公司會幫我安排一切，佢哋會幫我過濾！」他又說：「我從來冇過問做騷搵幾多錢，我知自己可以問，不過問咁多又點呢？我從來唔計較賺幾多，呢樣係價值同價格嘅問題，我唔識計數，只需做好工作就得！我120%相信公司，唔會諗咁做抵唔抵而唔去做，與其向後看，不如向前望仲好！」

靠和平保飯碗

Jason與無綫關係不俗，不過作為四大唱片公司旗下一員，他只有暫時絕迹無綫：「好多嘢我實在控制唔到，由細到大都唔係一個好識計劃嘅人，我知道只要相信同尊重公司，公司決唔會要我哋兜踎嘅！」他看似是一個沒有主見的人，但內裏卻是每事問：「其實我乜都會問，非常『竹升』！不過我唔鍾意將簡單複雜化，唔想浪費時間去面對一啲控制唔到嘅嘢！只要合理化，我就去做！」他知道唯命是從是唯一保住飯碗的方法，對於公司與公司之間的爭拗，他答得十分世界仔：「我唔講咁多，費事講多錯多！總之我唔想牽涉入爭拗之中，因為我係一個和平嘅人！」

靠靚聲上位的Jason，最近竟搶「靚聲王」李克勤的閘，率先推出靚聲天碟，成為香港第一位推出Blu Spec碟的歌手：「我唔知克勤都會出Blu Spec碟，都係見佢出咗我先知！其實先後都冇分別，最緊要係樂迷買我哋嘅碟！」他的賣點是靚聲，會否爭取成為新一代歌神？他說：「歌神我一定唔敢當啦！就算有機會都唔係10年8載嘅事，我仲有好大嘅進步空間，太遙不可及喇！我唔敢奢求！」

重提激凸「威喎」

去年Jason激凸成名，這也是他始料不到的事：「哈哈！人哋點寫我真係冇乜所謂，又唔係負面嘢，仲對自己有幫助添！我覺得真係威喎！」打從激凸事件發生後，原來他的那話兒着實不賴，不少女生也驚為天人，問到會否害怕遇上碧咸被非禮事件？他說：「我冇咸哥咁大，應該唔會畀人非禮啩！若然發生喺我身上，真係唔知報唔報警好！不過，咸哥身形好好，如果我有佢咁弗，或者都可以拍底褲廣告，我相信自己可以控制到！（裕美同G.E.M.有冇見過你嘅好身材？）我陳柏宇向大家嚴正聲明，所有緋聞都係假㗎！」

後記:操弗宣言

Jason看似細細粒，但其實擁有鋼條形的健碩身形，更對操弗之道諸多見解：「我要日操夜操，最鍾意打羽毛球！我為食，不過唔可以食咁多嘢，增肌粉我唔食，不過健康食品就會囉！」下刪幾百字操弗宣言！經過促膝談心後，小記感到Jason不但有主見，同樣是一個口水甚多的Nice Guy！