由幕後跳出幕前的馮曦妤（Fiona），即將推出新碟，這位經常笑意盈盈的小妮子，原來情迷鄭伊健，仍然有顆少女心呢！
童年篇 偶像藏心中
「細個梗係會有偶像，就係鄭伊健喇！不過我冇寫信畀佢，呢啲收埋喺心咪得囉！嗰時做幕後，有次伊健嚟公司，我仲驚到匿喺隔籬房，老闆知我鍾意佢，即刻叫我幫手斟茶畀伊健，我開心到癲咗！」
血拚篇 失控日本遊
「雖然我鍾意Shopping，不過唔會好瘋狂咁買，唔算購物狂！不過喺日本就例外，我試過一日用咗7千蚊港幣，真係咩都會買！衫褲鞋、飾物、袋，總之咩都買，不過第二日就好肉赤，之後嗰幾日都盡量唔使錢，哈哈！」
假設篇 對付臭狐友
「如果朋友有臭狐，我唔會直接同佢講，好似太尷尬……不過我會趁大時大節送支香體露畀佢，等佢自己醒覺囉！不過送完就算，唔會再刻意提起！試過有個男仔朋友啲鼻毛成日『撩』晒出嚟，我會細細聲提佢！」
感情篇 唔使男人錢
「婚後想唔想老公畀晒啲錢我？咁又唔使！如果佢主動畀晒啲錢我都冇所謂，哈哈！我唔會使男友嘅錢，亦唔會管住佢點使錢，向來都係財政獨立嘅！以前拍拖，男友會請我食飯同送禮物，不過唔會畀錢我使！（男友使你錢呢？）如果好鍾意都冇所謂，不過唔係依家，依家冇錢呀！」
常識篇 飲水止思噎
「要停止打思噎，可以食香口膠同飲水！有人話Kiss都可以止噎o架！不過我未試過，聽落太荒謬，我次次都係靠飲水嘅！」