17/03/2010

播放本新聞相關短片

樂易玲封嘴睇騷秘道鬆人

無綫高層陳志雲因涉貪事件一鋪清袋,間接令另一高層樂易玲隨時「升呢」坐正,前晚睇騷時被傳媒追訪的她,封嘴走秘道鬆人,避免講多錯多,影響升職機會。

自無綫業務經理陳志雲捲入涉貪事件,令無綫滿「城」風雨,與陳總同屬方逸華愛將的製作資源部總監樂易玲,趁「一人之下,萬人之上」的陳總失勢,最有機會「升呢」填補陳總之位,凌駕原本同職級的梁家樹、何麗全及曾勵珍,名副其實統領三軍!涉貪事件牽涉甚廣,在此敏感時刻,為免講多錯多,樂易玲連日來封口避談涉貪事件,但她前晚突然現身紅館欣賞BIG FOUR演唱會,曾承認與ICAC會面的她,立即成為記者追訪的對象。

陳家倫耍手拒開腔

原本安坐觀眾席欣賞演唱會的她,被記者重重包圍,嚇得她馬上起身,穿過控制台下的秘道潛入後台,再從特別通道離開。記者沿途要求她停步接受訪問,但她對「係咪再有藝人助查?」及「王賢誌爆料話有女高層收袋?」等問題充耳不聞,記者再三追問下,她只冷淡地拋下一句:「你哋咁冇秩序,我唔講!」然後上車,絕塵離去。

在演唱會慶功宴上,曾於03年捲入ICAC「舞影行動」的前《勁歌金曲》監製陳家倫,惟已獲廉署證清白的他,甫見記者即耍手擰頭,拒絕回應所有提問,只肯企定定影相。

梁材遠冇搵寧進參演

至於監製梁材遠昨日出席新劇《隔離七日情》宣傳活動時,被問到有傳捲入涉貪事件的陳總「愛將」寧進有份飾演保安員?他馬上否認:「嗰日好多人試鏡,但我冇接觸過佢!(有冇合作過?)之前都合作過好多次!《蒲松齡》都有。(有人推薦佢?)冇,總之啱用咪用囉!劇集係獨立創作,冇人要求角色調動!」

對於前無綫藝員王賢誌日前爆料,指有無綫女高層收受價值高達六位數字的名牌手袋,為涉貪事件加熱,亦令戲劇製作總監曾勵珍大動肝火,強烈否認與事件有關,梁材遠對此表現避忌:「你哋問番佢啦!(佢有冇收過手袋?)我唔為意,但我未試過咁好彩,總之我跟住公司指引做事!」而曾監製《烈火雄心》系列的王心慰亦對傳聞表現冷淡:「我冇聽過呢件事,亦冇收過手袋喎!(月餅呢?)喺大房大家一齊食嘅就見過!」

Profile

樂易玲(Virginia)

年齡 :50歲

TVB年資 :7年

「樂迷」黨羽 :林峯、鄭嘉穎、吳卓羲、徐子珊

專案組