徐淑敏(Suki)今個月23號就剖腹生BB女,錫到佢燶嘅準老竇黃浩(Kenny)當然緊張到爆,早幾日,小小So打電話畀佢傾吓偈,關心吓佢老婆依家情況點。
小小So:準爸爸,心情點呀?
Kenny:好興奮呀!好想快啲見到BB女!
小小So:執好走佬袋(孕婦行李)未呀?
Kenny:執好晒喇!可以隨時入院。
小小So:Suki最近胃口好嗎?
Kenny:佢依家胃口幾好,佗得唔算辛苦,只係頭一個星期有嘔吓,之後都冇乜。
小小So:好多人話女人大肚最靚,有冇諗住同太太影番輯大肚寫真?
Kenny:原本都有諗過o架!但Suki覺得自己有啲腫,所以最後決定唔影喇!
小小So:剖腹生BB,有冇特登擇時辰?
Kenny:有,叫楊天命師傅幫我哋擇嘅,個時辰旺父母,而佢聰明得嚟仲會係舒服命。
小小So:好好噃!Suki生咗之後,你有排冇得瞓,依家記得好好休息喇!
Kenny:知道喇!多謝關心!