向來與陳志雲不咬弦的王賢誌，昨日在馬場表示，沒有傳短訊慰問，對於有傳無綫高層收厚禮引起廉署關注，他說：「好核突！有啲人中秋節會拎月餅上監製房派，好似搵撈咁，又或者送Hermès手袋畀女高層，我真係做唔出，頂多喺Canteen撞到請飲杯嘢！」不過，他對此不感奇怪：「呢行咩人都有，我只會敲吓監製房門，問吓有咩啱做，我依家先知超過500蚊唔收得！（以前唔知？）我唔送禮物，唔怪得我唔紅又冇畀人捧啦！」
王賢誌還表示從未跟叢培崑接洽工作，並自嘲說：「唔會搵我啦！咁多愛將，我又唔係TVB人。（傳湯盈盈接受調查？）我哋有通電話，佢冇提過。」對於藝人被壓價的傳聞，他說：「大家都知呢行係海鮮價，同幕後或主辦商熟啲可能收平啲，又或者Friend啲唔收都唔知。（傳叢培崑賺埋無綫嗰份？）唔知，我離開咗3年！」
同樣現身馬場的無綫製作部（非戲劇製作）總監何麗全，被追問有否傳短訊問候陳志雲及有否接受調查，他僅搖頭微笑；而陳百祥則表示一直在橫店拍戲，對事件毫不知情。
另外，薛家燕昨晚在九龍灣筵開100席慶祝60歲生日，無綫高層樂易玲、何麗全及曾勵珍等全部缺席，本答應獻唱的陳志雲亦甩底！到賀的馬德鐘、謝天華、佘詩曼及張可頤等，對涉貪事件不欲多談，阿佘聽到被傳在助查名單之列，更整個彈起說：「多謝晒！生日快樂！」然後雞咁腳離座。至於家燕姐則自爆是「送禮黨」成員：「我有送月餅o架！唔只高層，化妝間阿姐都送，呢啲係心意，多謝佢哋成年嘅支持。（搵撈？）冇諗過。」她還力撐陳志雲說：「佢唔似會咁做，我叫佢做義工，佢好樂意，我話請佢食飯，到頭來都係佢埋單。」
張可頤：敏感咗啲
至於張可頤則表示會為陳志雲祈禱：「我本身係鬼婆，唔識中國人嘅禮儀（指送禮），或者要學吓，但送貴袋同手錶又真係敏感咗啲！」謝天華則表示禮物價值因人而異，最重要是心意。至於無綫外事部副總監曾醒明則表示，未聽過「送袋」傳聞，而生日禮物方面，他相信高層懂得處理。