阿詩屬另類中的主流，亦是主流中的另類，但她亦有傳統的一面，她說：「我重視家庭觀念，好鍾意小朋友，見到身邊朋友有小朋友，見到佢哋餅印一樣，我都會『恨』，會去諗嘅，如果係生嘅話，想生個仔，因為囝囝似媽咪，隨住年齡增長，再唔生就真係抿水，但暫時都係以事業為重。」阿詩對生仔得個「諗」字，但談起工作，她相當着緊。阿詩的演藝星途暢順，除遇到志同道合的音樂人和靠努力打拚外，最重要是獲伯樂賞識，其中一位便是師傅梅艷芳。不知不覺，梅姐已離開我們六年多，阿詩已將對師傅的思念，轉化為動力，問到有否夢見梅姐？她說：「經常，每一次發夢感覺都好強烈。（喊？）還好啦！每次夢見佢，都有種鼓勵感覺，好似叫緊我加油。依家我每做一件事，或者做每個決定，都會諗吓佢有乜嘢反應，會諗吓佢點睇件事。」
與汪明荃情同母女
除梅姐外，另一位阿姐汪明荃，亦對阿詩甚為疼錫。阿姐和阿詩合作無綫處境劇《女王辦公室》，兩人飾演母女，經常鬥嘴，私底下亦情同母女，阿詩說：「阿姐成日鼓勵我，又話我愈做愈自然。（畀阿姐鬧？）咁又冇，佢對我哋好好，唔會立亂鬧人，唔係坊間所講咁惡，佢有可愛一面，直腸直肚，唔虛偽，有乜嘢會直接講。」阿姐表面嚴格，但其實很關心後輩，阿詩說：「佢知我助手貧血易暈，就攞啲黑棗送畀佢補血，阿姐對其他人照顧周到，大家有乜頭暈身慶，就返屋企摷啲珍藏出嚟。（考慮同阿姐上契？）咁又冇，但我當正佢係『阿媽』，開頭冇諗過咁夾，佢鍾意啲人爽直，咁我又唔會擦鞋，佢性格比我（爽）直三倍，好多人都好驚佢，但其實唔係咁得人驚。」
滿意度身訂造角色
而阿詩在《女》劇飾演的繆惜之，令視迷留下印象，她謙稱：「角色性格同我本人差唔多， 冇見過我嘅觀眾，會留意我講嘢語氣同小動作，有7、8成演番自己，班編劇好犀利，睇到其他人未必睇到嘅嘢，個角色可以話係度身訂造。（點睇收視報捷？）貪心啲希望更加好，因為台前幕後好重視，而且配搭新鮮。公司春茗嗰晚，我被安排坐樂小姐（樂易玲）隔籬，我同佢講拍得好開心！（添食？）未知。（入屋？）咁我又冇特登諗，因為套劇最吸引我嘅係阿姐同埋杜汶澤，好似幾好玩咁！」
問到拍《女》劇最難忘的片段，阿詩笑說：「一定係古裝，我諗全港觀眾都好難忘，直頭驚嚇，真係怕引起投訴！至於劇中我同阿澤影結婚相，都幾難忘，唔知點解，我次次拍親劇都有呢啲場面，唔知係咪啲編劇想笑，所以安排我着婚紗？」她坦言與阿澤稱兄道妹：「由細識到佢大，佢好似我哥哥咁，所以拍呢個場面，有啲亂倫感覺，但估唔到擦到火花。（真係愛上？）嘩！咁又難啲，佢當我阿妹。」阿詩笑言為了欣賞自己的演出，會叫公司安排晚上8時前或8時半後的工作：「有時睇番自己演出都有啲怪，成日覺得可以做好啲，明白演技真係要浸。」
自嘲「中女」再培訓
自去年十月完成演唱會後，阿詩搖身一變成演員，參演舞台劇《男人與女人之戰爭與和平》，又拍攝電影《奪命金》，再加上《女王辦公室》，一年內涉獵歌、影、視、劇四大範疇，她亦不禁帶笑自嘲：「好耐冇唱過歌，幾個月冇做過音樂，轉咗行做演員，中年女士再培訓。」
雖然近月埋首演戲，但阿詩沒有放棄音樂：「依家籌備國語唱片，一路收緊歌詞，但未正式錄音，我鍾意做演員。（演上癮？）都會，演戲壓力好似冇咁大，唔同唱歌要顧及好多嘢，反而演繹好個角色先緊要，拍戲或拍劇身體勞動較大，但精神稍為輕鬆。（幾時「重返」樂壇？）冇離開過，今年主攻國語市場，因為有更多潛力同空間。（普通話掂？）經過之前特訓，可以更加好，我對自己要求幾高，要撇除港式普通話，要認真去做國語市場。」
阿詩入行多年，拿過不少音樂大獎，而她今年亦有份角逐金像獎「最佳女配角」，問到對獎項是否仍執着？她笑說：「我對金像獎較着緊，因為有新鮮感。（勝算？）唔敢諗，多謝導演劉偉強，演員嘅功勞三成，導演有七成，因為佢導住你演，好多謝佢對我咁有信心。」阿詩擔心屆時沒機會上台講得獎感受，故先在訪問內表達心聲，但她揚言會穿上靚裙盛裝赴會：「話晒第一次以提名人身份行紅地氈，點都整條拖尾長裙。」
後記：自組貓貓馬戲團
何韻詩家中養了四隻貓，更改了「嘰哩」、「咕嚕」等搞笑名字，平日她最愛將愛貓的一舉一動拍低，再上載到Blog與樂迷分享。去年生日，阿詩抱着愛貓影生日合照，閒時又弄貓為樂，更笑言要自組「貓貓馬戲團」。而阿詩在街上見到貓，亦忍不住跑上前攬個夠，「貓癡」絕非浪得虛名！