提到80後的男歌手，熱門是方大同或陳偉霆等，可會想起周柏豪？08年憑熱爆K歌《一事無成》，令柏豪人氣急升。柏豪與師妹「翻版徐子淇」鍾浠文（Zelia）的緋聞傳得鬧哄哄，但他再三否認，強調只是朋友︰「嗰日被影到一齊晚飯唔係得兩個人，大家又住得近，有次車佢返屋企啫！」但他透露將來不排除發展的機會︰「唔會答你冇可能，萬一之後一齊，咪畀你哋話我講大話！」而愛貓的柏豪，問到會否揀個愛貓的女友，他說︰「諗過，可以幫我照顧啲貓。（將來女友要似貓咁性格高傲？）高傲好有個性，但唔好太過有性格，如果唔係會幾難相處，但好似貓咁貪靚同清潔梗係好啦！」屬天蠍座的柏豪坦言，自我中心很強，故不能跟很有個性的人拍拖，不然會好忟憎。至於會否以星座參考揀女友？他說︰「會o架！星座書話我同巨蟹座、雙魚座夾，如果見到啲女仔係呢兩個星座，會特別留意，睇吓夾唔夾。（你啲緋聞女友都係呢啲星座？）唔知。」

自嘲多情頻食檸檬

柏豪出道3年，分別跟幾位靚女傳緋聞，問到擇偶條件是否要靚女？他指住在場的工作人員笑說︰「我唔信其他男仔唔鍾意靚女，搵個靚嘅女友梗係好啦！但最緊要心地好、錫屋企人、做人有目標又熱愛工作。如果個女仔靚固然加分，心地又好又有共同興趣，咁就冇得彈。」柏豪更表示如果樣靚，但心地差便朋友都冇得做，卻被記者笑他必定被美女迷倒。問到曾否被女仔派檸檬，柏豪自嘲屢見不鮮︰「梗有啦！讀書時恃住自己係籃球隊隊長，又有幾分英俊，咪會追吓女仔囉！但成日畀同學講話『呢個周柏豪好花心』，啲女仔咪唔接受我，當我對個女仔係真心時，人哋覺得我係玩玩吓。（係咪花心？）係多情啫！（食檸檬好傷心？）覺得得意，因為愈被拒絕，愈要克服。就算唔開心，我好快會冇事。」而友人替他分析被指花心的原因，柏豪說︰「可能我對個個女仔都咁好，咪令人誤會我好似係女仔都追囉！但我只係尊重女性。」

感謝恩師救出黑洞

每人都有低潮，原來柏豪做歌手前曾迷失方向，他說︰「之前做模特兒出身，得閒教人游水、打籃球，但之後青春期塊面好多暗瘡，少咗好多模特兒工作，你話點維持生計？」當時柏豪半年沒有工作，覺得迷失方向︰「喺我好迷失時得6隻貓陪住我，諗過放棄，但唔知做得啲乜，根本冇目標。」幸運地，他在朋友介紹下，來到音樂人陳光榮的工作室做幕後工作，他說︰「開始接觸音樂，之後同陳光榮學作曲，佢好錫我，仲畀機會我。」陳光榮的出現令柏豪找到人生目標，07年出道做歌手，他十分感激對方︰「監製救我出黑洞，當時我好迷惘，係佢帶我入行，令我咁鍾意音樂。」他坦言十分尊敬恩師︰「監製同我嘅成長好似，所以我會視佢為我模仿對象，當佢係我偶像。」

視余文樂奮鬥目標

柏豪除外形似足余文樂，亦同是由行天橋轉做歌手，入行前兩人的家境亦不算理想。現在，余文樂主攻電影，柏豪亦嘗試拍劇、拍電影和出書，問到會否像阿樂一樣放下音樂？他說︰「我好開心佢有今日成就，我會揀多方面發展，我會以佢嘅電影成就為目標，但我都好鍾意音樂，唔會放棄，因為仲想有更多創作。」他不希望外界拿他與阿樂比較，希望大家知道他叫周柏豪，不是「好似余文樂嗰個」。此外，他亦不希望專注單方面發展，因他對音樂、電影和出書也感興趣︰「一齊做好有挑戰性，又可以學到多啲嘢，每個時間你會鍾意你當時做緊嗰樣嘢，好似最近要排舞台劇，我會覺得好好玩，所以我唔會話放棄其中一方面。」最近，柏豪處男下海演舞台劇，他坦言有點緊張，但十分期待，由錄音室踩上舞台，希望在舞台劇界創出另一片藍天。

後記：貓咪陪走過低潮

「貓癡」周柏豪被問到有關他與貓的事時，他興奮地說︰「依家有5隻貓，之前有一隻死咗。」他更一口氣把6隻貓的名字講了兩次，但當問到為何喜歡貓時，他說︰「唔係話咁鍾意，只係當時被迫收養佢哋，但佢哋都幾重要，我最迷失時陪住我，又教識我咩係責任心。」其後柏豪與工作人員分享湊貓經。