合體回歸樂壇後的Twins成為搶手貨，下月16、17日舉行的紅館個唱，內部訂購出現搶飛潮，英皇考慮加場，但據知受場期所限，一切正在商議中。另外，導演王晶密斟Twins與古天樂合演魔幻特技喜劇《阿拉甲》，故事講述蔡卓妍（阿Sa）與鍾欣桐（阿嬌）愛上古天樂，一個演仙女，一個演人的角色，預計下月開拍，據知王晶出動銀彈利誘，誓飲她們孖住復出拍戲的頭啖湯。

攻內地市場

記者就此事向王晶了解，他承認邀Twins開戲：「我覺得好啱佢哋做，佢哋同古仔配搭新鮮啲，咁啱Twins一齊出番嚟，Impact（衝擊）都幾大。」問到是否以逾千萬元邀孖妹演出，王晶說：「未到，但都唔少啦！未試過咁高。（同阿嬌內地解封有冇關係？）各方面因素都有啲，當然內地市場係最重要原因！」 Twins得悉演唱會訂飛反應熱烈，並獲王晶支持，她們興奮地說：「好開心咁多人支持我哋，總之我哋唔會辜負歌迷嘅厚望，會傾盡全力演出。」