無綫高層爆出貪污醜聞，有藝人相繼接受廉署調查，陳志雲愛將鄧健泓昨日深表憂心，但強調不擔心被問話，他在電話中說：「問咪問囉！冇問題！」至於陳志雲前晚十時許由北角ICAC返回寓所，鄧健泓表示沒有致電他，但有以短訊問候：「有SMS畀陳志雲，但冇回覆，知道佢需要時間冷靜，或者佢依家抖緊。佢作為提攜我嘅恩師，我都有啲擔心。（有冇諗過點幫佢？）冇嘢可以幫到佢。」對於有指陳志雲為捧他而惹不滿，鄧健泓說：「呢個講法同件事冇關，唔好攞埋一齊講！但人哋要咁講我都冇辦法。」
森美：價錢唔啱冇合作
而因主持《美女廚房》與錢國偉（Wilson）稔熟的鄭中基，昨日出席電影活動時表示已發短訊慰問對方，他直言當初知道消息時，還以為是誤傳，後得知屬實即十分擔心。問到曾否被人壓價？他說：「冇，冇同嗰間公司（「思潮廣告制作有限公司」）合作過，暫時冇廉署人員聯絡過我，但唔介意幫手。（Wilson有冇覆你？）我啲SMS唔使覆，只係叫佢休息吓。」
其實今次「出事」的源頭與「思潮」疑收取不合理利潤有關，該公司董事叢培崑（阿Ed）雖不是幕前人，但因陳志雲的關係而與不少圈中人熟落，森美昨日出席活動時承認認識對方，他說：「我同阿Ed可以稱為朋友，但唔係深交。（有冇試過以較低酬勞接活動？）冇，佢有問過我價錢，但從來冇壓過我價，亦試過價錢唔啱所以冇接。（免費呢？）冇。」他表示暫未有ICAC人員要求他助查，但如果有需要亦會幫手：「尊重法律精神，我都希望佢哋冇事，以前陳生（陳志雲）好照顧我，關係幾好，都有SMS佢。（係咪「志雲黨」？）我唔知，我都做過Wilson監製嘅《殘酷一叮》，但冇佢電話號碼，已託朋友問候。」
莊思敏：有人叫收平啲
另外，莊思敏早前透露阿Ed曾為她接工作，她昨日出席活動時表示沒有被人壓價，問到是否有人位高權重？她說：「諗多咗，傾好價錢先會做。經濟唔好，可能有人會叫收平啲，但如果咁都覺得畀人壓價或從中抽佣，就會覺得自己成日畀人迫害。（有冇人叫你助查？）未有，如果需要會盡力協助，佢哋係好人。」