女星天天都有新裝上場，近期興起一股動物風，時裝設計師Celia為這班Animal Lover逐一品評！
熊黛林 10分
「熊黛林體形完美，身材勻稱，着起呢類晚裝簡直冇得彈，而件晚裝以斑馬圖案設計，令佢好似置身森林一樣，高貴得嚟又有少少野性。」
容祖兒 9分
「向來好有時裝觸覺嘅祖兒，不嬲襯衫都冇乜失手，今次造型重點係搶眼十足嘅仙鶴褲，上身就用黑色上衣配搭，再加上金屬手鐲，感覺有型又玩味。」
Angelababy 初春清新 8分
「呢條漸變色連身短裙，望落去好似孔雀咁靚，條裙設計好有層次，藍綠顏色同佢嘅白淨肌膚好襯，成個造型既高貴又唔老積，好有初春感覺。」
鄧麗欣流行指標 7分
「今年好興豹紋，佢呢身豹紋裙再加毛毛外套嘅打扮，充分帶出流行元素。而件毛毛短身外套以大領設計，感覺唔會過分成熟。」
呂慧儀薄質睡衣 3分
「呢條Low Cut絲質豹紋裙雖然凸顯到佢嘅性感本色，不過質地太薄，感覺好似睡衣，唔夠大方得體。」
徐子珊自暴其短 4分
「徐子珊條青蛙連身裙原本幾可愛，不過下身嘅黑色絲襪同鞋就唔襯件衫，呢對絲襪顯得佢對腳又短又粗，真係自暴其短。」
Celia Wong
陳慧琳御用時裝顧問黃欐堯（Celia），畢業於理工大學設計系，曾與不少圈中人合作，包括江若琳和謝安琪等。