黎明前晚與任賢齊等出席《火龍》MV首播禮，由於撞正結婚兩周年紀念，活動完結後他沒有受訪便走人。在台上，黎明繼續大爆金句，據悉出場前他在後台搞笑地撕掉大會貓紙：「舞台人唔需要呢啲嘢！」小齊亦附和：「係囉！我哋識發揮！」上台後，黎明果然盡顯「舞台人」功架， 爆肚問觀眾：「電影公司安排《火龍》4月1號上畫，究竟係愚人節玩觀眾定真嘅呢？」不料觀眾答：「愚人節，玩人！」黎明只好另選一位觀眾再問：「4月1號去到戲院，戲院話冇《火龍》，你信唔信？」該觀眾終於答對，黎明成功送出禮物，即說：「呢啲咪問題囉！」

對於黐鬚演出，黎明說：「小齊唔使，但我冇反感，因為大家抽嘅籌唔同，就好似做娛樂圈咁，要睇命運安排。不過聽講今次啲鬚係用河馬身上某部分嘅毛做成，我黐咗之後，感覺自己好河馬！」

被小齊食物引誘

而小齊卻幸災樂禍：「佢黐咗鬚唔方便食嘢，但我哋成日引佢。（啲鬚係河馬屁股毛？）接近啩？都冇人答到係咪，我有問佢有冇味？佢冇答我，我就冇聞過，怕陣味好冤。（黎明趕住去慶祝？）唔知，唔方便代答，我都想走，下晝訪問都講晒嘢，係咁啱諗到河馬未講囉！（你興唔興慶祝紀念日？）盡力啦！女士記好多紀念日，我就連今日幾多號都唔知，不過相識紀念日會記得，係3月14日白色情人節，但未諗到點慶祝。（求婚？）我好忙，依家係『任四組』，香港、內地都有嘢拍。」